阿爺出手有跡可尋
2014年03月17日
呢兩日假期發生的事情真係多，烏克蘭克里米亞地區公投加入俄羅斯，歐美玩制裁，金融市場動盪；中國決定將人民幣每日波幅由1%擴大到2%，一步步向匯率浮動過渡；上周五人民銀行暫停網企的虛擬信用卡業務，搞到騰訊(700) 等網股大插。仲有新世界(017) 宣佈3股供1股，集資將旗下新世界中國(917) 私有化，或者先從新世界講起。
新世界宣佈以「3股供1股」的方式，供股價6.2元，較停牌前股價大折讓36.3%供股，集資133至140億元，集資所得用每股6.8元收購新世界中國28.8%街外股份，私有化新世界中國，私有化價格較新中停牌前價格有32.3%溢價，涉資186億元。若然私有化新中不成功，新世界供股計劃亦不停止，會將供股所得用在中國和香港增添土地儲備。
純官供股 莫衝動沽
新世界供股計劃一出，上周五新世界即插14%，收報8.27元，和供股價6.2元相比，供股價仍較市價有25%折讓。相反獲提價私有化的新中，股價勁升29%至6.63元，私有化價格6.8元距現價只有2.5%溢價。
新世界咁樣大比例3股供1股，唔同新地10送1紅股咁樣小幅集資，市場罵聲不絕，小股東上周五已用腳投票。新世界上一次供股在2011年10月，事隔不足3年又來向股東伸手，當然幾討厭，顯示跟純官搵食一啲都唔易。美銀形容在「最預期不到的時間私有化新世界中國」，因為私有化價格不便宜，新世界自己卻在股價對資產值有顯著折讓時供股，攤薄股東權益。睇番新中過去一年已升咗37%，停牌前股價較資產值折讓收窄至30%，去年底每股資產值6.68元，私有化價6.8元有1.8%的輕微溢價，美銀指內房股今年預測市價較資產值平均有30%折讓，即是市帳率平均0.7倍，顯示私有化價不便宜。
評價負面，自然齊齊喊沽新世界。我雖然都覺得新世界咁樣大比例供股有啲老土，但認為新中股東要沽股，因為已升咗咁多，而私有化未必百分百成事，但新世界股東到如今就未必要走，供股有得博。
逆向思維 插低跟供
要研究新世界做乜供股，要從大股東心態開始，新世界大老闆彤叔已經唔郁得，由個仔純官打骰，街外人靠估，供股為公為私都有可能。先講為公，照牌面睇新世界中國股價唔平，為乜要買埋28.8%新中的街貨？唯一的解釋是純官認為即使新中升咗唔少，但價值仍遠被低估，所以新世界買番28.8%新中街貨有着數。
以新中私有化價計，等如整間公司市值646億。新中截至去年6月30日的上一年度全年純利達46.16億元，按年增長49.8%，不計資產估值上升及折舊等因素的全年核心盈利增63.7%至33.3億元。新中對上一年的合約物業銷售額上升69%至165.3億元人民幣，若和其他內房股比較，只能算一間中型內房公司，和那些銷售以1000億元計的巨型內房企業還有一段距離。不過純官睇好新中，可能看好公司入得場早，土地儲備便宜，行內估截至去年中，新中在內地20多個城市有超過2600萬平方米土地儲備，加上大量商場物業在資產負債表上，唔係估值估到咁足，若然佢睇好內地樓市長遠前景，自然覺得新中便宜。當然，大股東若然為私，自然係想低價供股博你唔供佢供埋，平價增持。
擴大波幅 人仔料穩
新世界咁樣供股法，股價短期受壓，小股東喊都無謂。但我又玩吓「逆向思維」，叫股東即使唔高興，都唔好太輕易沽貨走人，有多餘錢更可跟供，以6.2元的供股價計，供呢部份新股睇一年博佢有50%回報。若然大股東唔想人跟，近供股期股價會再跌，若然除權前插到7.5元樓下，更加可以分段吸納，跟供睇一年中線。說到底新世界都有一定資產，雖然大市對地產股不利，但佢自插三刀跌咗咁多時，又唔怕跟佢玩吓。
另外，人民幣擴大匯價波幅，由每日波動1%，擴大到2%，顯示阿爺繼續朝向人民幣自由浮動的方向發展，雖然未知擴大波幅會否帶來股市的短期波動，但以人仔匯價計，相信擴波幅後唔會再跌得太厲害。人仔今年匯價向下，在1月14日人仔兌美元匯價到達21年高位6.0406後(1美元兌人民幣價)後，一直回落，上周五回到收市的6.15左近，比高位跌咗1.8%，相信阿爺隊低人仔匯價，除了阻截熱錢流入之外，亦為擴大每日波幅作準備，事先跌咗，擴大波幅後，相信阿爺傾向維穩，反而唔似會畀人仔再急步向下。
叫停支付 網股捱沽
所以我估上周五網股急跌浪尾的餘波，可能大過人仔擴波幅的影響。上周五股網經歷了一場小股災，事緣人民銀行緊急下達的通知，全面「暫停」騰訊(700) 屬下微信和阿里巴巴屬下支付寶搞緊的「虛擬信用卡」業務。兩個互聯網巨頭都正在夥拍中信銀行(998) 搞這些虛擬信用卡，即係客戶在手機有軟件或二維碼，去到實體商店購物或提貨時用這種虛擬信用卡「嘟一嘟」就可以付款，不用實際去擦卡，虛擬信用卡被網企視為一種新的O2O業務(即Online to Offline，由網上到實體)。
上周五市場早段一度誤傳人行係永遠「叫停」這些虛擬信用卡，龍頭股騰訊一度暴瀉6.8%，低見548元，比3月7日造出的歷史最高位646元，足足跌了98元。及後，人行澄清只是關注保安問題而要求「暫停」，騰訊跌勢始喘定，收報564元，單日跌4%，與歷史高位相差82元，即係現價比十日前高位唔見咗12.7%。
此外，與「雙馬」合作發行虛擬信用卡的中信銀行(998) 也急回，半日跌6.9%，收3.94元，午後更停牌，享受唔到下午的小反彈，其後佢發澄清通告，只是解釋和「雙馬」發展虛擬信用卡的詳情，未有觸及人行叫停的問題。
網股價貴 調整正常
騰訊一散，其他科網股、支付股都出現洗倉潮，小米雷軍嗰隻金山軟件(3888) 、阿里巴巴入咗股的中信21世紀(241) 、玩支付業務的創新支付(8083) 最多瀉一成至兩成，資金一度大逃亡，及後跌幅收窄，金山軟件收市跌5.2%；中信21世紀跌7.9%；創新支付跌14.6%，網股跌市算係由「股災級」變為「小股災級」。
有人話人行出手累到網股大跌無路捉，我又唔係咁同意。第一，騰訊從高位累跌12.7%，但上周五其實只跌4%，即係話之前已急回，只不過借人行叫停的消息，插多一轉，網股炒得過熱，即使唔係災，有一個較大調整都好正常。咁多輪商發咗騰訊輪，插低啲回購吓都好呀；第二，網股玩得太癲，入侵銀行業務太快，阿爺干預只是早晚的事，若然阿里巴巴和騰訊企穩做虛擬信用卡業務，之後好似玩「打的」(叫的士)手機應用程式咁大打減價戰，可能唔夠一年，都係雙馬玩晒，銀行唔使再做信用卡業務。所以雙馬癲到咁上下，阿爺一定會插手保護銀行，唔想銀行散得太快。
結論係阿爺出手，有跡可尋。網股價貴，炒股要有風險意識也。
陸羽仁
金融High Tea 舊文
