炒油管睇位食
2014年05月23日
大市跟住劇本發展，恒生指數大跌佢唔跌，趁住美股反彈，佢又繼續向上夾一夾，個別股種仲趁吓消息炒吓?。中俄昨日簽訂30年天然氣協議，油管股即刻就夾高食番鋪胡先！
中美雙炮鬥單車
中、美、俄係全球政治大棋盤的三粒重要棋子，家個局係雙炮對單車，中俄兩個要夾手夾腳先可以頂住山姆大叔，俄國係能源大國、中國係生產大國，兩者有合作空間，今次協議後北極熊有咗中國咁大嘅天然資源買家，收入有着落，自然少咗對美國經濟制裁的憂慮，在烏克蘭的角力，少咗後顧之憂。
中國有咗能源保證，唔使俾美國挾住，條數計落都有着數，國與國的交往以利字掛帥，中俄傾咗十年的天然氣合作，喺美國佬做咗共同敵人後終於成功開局。
據天然氣合作協議合同，由2018年起，俄羅斯開始通過中俄天然氣管道東線向中國供氣，為期30年，輸氣量將逐年增加，最終達到每年380億立方米。
依照安排，俄羅斯天然氣工業股份公司負責氣田開發、天然氣處理廠和俄羅斯境內管道建設；中石油(857) 將負責境內輸氣管道和儲氣庫等配套設施建設。相關股全面造好，勝利管道(1080) 收0.49元，急彈24%，成交激增至9492萬股，為半年來最多；天大油管(839) 高見1.76元，收1.71元，升14%，幾隻股份齊齊高收。由於大項目落實，呢類股份長遠前景可以睇好啲。但股票升咁多有炒味，有貨在手要睇位落車，短線高追亦咪制。
藍籌方面，昆侖能源(135) 升4%，今天除息的中石化(386) 升2%，中石化最近係改革股權結構上聲氣多多，股價係6.8元至7.2元區間上落，係一隻悶市博賺餐茶的對象。
港股全日造好下，收市升逾百點，惟兩萬三得而復失。恒生指數收報22953點，升117點；國企指數收報10109點，升114點，成交金額增加至625億元。
家個市搵嘢炒，主要都係喺美國同中國搵概念。昨日，國家發改委發佈了首批鼓勵社會投資的項目，涉及交通基礎設施、信息基礎設施、清潔能源工程、油氣管網及儲氣設施、現代煤化工和石化產業五大方面的80個項目，比較搶眼球係北京地鐵16號線項目都在列。
據了解，16號線是北京市城區西部的南北幹線，自豐臺宛平城站至海淀北安河站，全長約49.8公里，共設29座車站。目前，部份車站已經開工建設，預計年底所有站點全部開工。
港鐵變咗漏氣皮球
北京市基礎設施投資有限公司稱，地鐵16號線總投資約500億元人民幣，其中引入社會資本約270億元。相關負責人表示，社會資本的融入不僅可以減輕政府投資的資金壓力，同時也降低整個融資成本。最重要的是，通過融入社會資本，增加運營的競爭機制。
北京地鐵民營化好明顯係學香港，但港鐵(066) 近日因為項目延誤，成為眾矢之的，問題仲愈揭愈多，最新講法係港島南線都可能無法係預期時間完工。
陸羽仁有唔少老友睇好港鐵幾條線發展帶動區內經濟，家港鐵管理層好似漏氣嘅皮球，吹都吹唔脹，真係哭笑不得。
押注港鐵新線概念的朋友唔知開心定係要喊，皆因佢係港島南已經搞咗啲生意，仲買埋物業等開通，點知家聽到話要遲，即係話檔生意仲要捱。不過，佢老哥仲有本錢喺手，雖有自我安慰話如果項目落後，或者有機會可以再執啲平貨。
陸羽仁
金融High Tea 舊文
