低處不勝寒
2014年08月25日
美股上周五輕微低收，杜指剛剛收喺17000點樓上，由於美股同港股都係險守心理關口，唔排除呢個星期，好友淡友仲有一輪角力。
上上落落一番，港股上個星期終於企穩咗喺兩萬五千點，同時亦係6年幾新高。喺呢個時候，示警叫人小心的聲音開始多咗，由於恒指已經幾年無見過咁嘅高位，故此好多人形容家個市係高處不勝寒。
究竟個市係咪高處不勝寒，呢樣係好主觀嘅，先唔講寒唔寒嘅問題，淨係講港股算唔算高，咁又點睇呢？港股高唔高，可以分好多指標去量度。從指數嚟講，港股雖然係升到兩萬五千點，但就同歷史最高點喺2007年10月30日創出嘅31638點，相距差不多6600點，仲未計入期間通脹因素。
橫計掂計港股唔算高
相比港股，美股早已創咗歷史新高，上個星期杜指收報17001點，當然唔係歷史新高，但都距離不遠，即係話美股頂峰是在呢一浪創出。杜指上一個浪頂出現時間係14198點，時間同樣係2007年10月，之後由於次按出現，再陸續引發毒債問題同衍生金融產品，令美股大跌，事隔一年美股跌穿9000點大關。美股呢個熊市維持兩至三年，之後喺聯邦儲備局用直升機派銀紙泵水下回升，終於到2013年4月11日，杜指創出14865點新高收市。
以目前指數，杜指比上次歷史高峰再超出一成半，用番同一把尺，等如恒指升到36000點樓上，即係要升多四成。如果用內地A股比較，相差就更遠了，上證綜指同樣喺2007年創出新高，到達6124點，家只係高位嘅三成半而已。港股近年受內地股市影響多過受美股影響，或者因為呢個理由，故此港股喺金融海嘯做起步點計，比起美股跑輸差不多三分之一，不過，比起內地股市就好得多啦，如果用美股把尺嚟睇，港股唔叫高而係低，用內地比就相反嘞。
至於個股情況如何呢？以今次帶領美股升浪的科技股計，龍頭蘋果公司喺推出新手機帶動下，升破咗拆細後股價100美元，衝上歷史高位。至於港股，龍頭騰訊(700) 無錯係升好多，但其他帶領呢個升浪的的重磅股好似港交所(388) ，歷史高價是2007年11月創出的265.4元，比上個星期收市價高出44%，幅度同大市差唔多，喺差不多時間創出過154.2元的價位，相差仲多，有成62%。所以如果用股價嚟計，家好多藍籌仲喺中途站浮沉緊，有好多股民仲做緊大閘蟹等甩身，所以你喺街唔係見到咁多人興奮講股，兜去中資銀行，仲唔見到牛頭角順嫂喺度爭撳機。
除用指數同股價嚟睇大市外，用估值又點睇呢？以市盈率計，1973年股災前，恒生指數成份股市盈率係33倍，至於2007年大市31000點樓上時，市盈率係24倍，家大約係12倍左右。過去3年計，港股市盈率最低去過10倍，甚至9倍樓下，今年4月最低去過10.4倍，有人覺得高處不勝寒，多少就係因為個市幾個月間，由低位急升咗咁多產生的感覺。
唔高不代表無危險
講咗咁大堆數據，大家唔好誤會，以為陸羽仁想講個市好抵買。陸羽仁想講嘅係，個市升咗咁多，但究竟算唔算高呢？從好多角度嚟講，個市其實唔算真係好高，但唔高係唔係等於唔一定寒呢？咁又未必，因為寒唔寒仲要睇好多因素。好似家美股嘅牛牛，就算唔係老牛，至少都步入中年，健康好容易出問題，加上美國聯儲局班理事，已經夾埋為明年加息出晒口術，如果未來復甦步伐唔變，息口好大機會上調，隨時觸發美股出現一次有深度的調整。
至於中港因素方面，好明顯係經濟仲係下行循環運動，企業經營環境唔係咁好，股市升得高，就等於同實體經濟背馳愈嚴重，兩者差距愈來愈遠。換句話說，家股市問題只係指數高或股值高，而實體經濟仲未得，要驚嘅係股市走得太快，所以投資者唔係要驚高處不勝寒，而係驚低處不勝寒。
有人會問，高處不勝寒同低處不勝寒有乜分別先？陸SIR你係咪玩語言藝術呀？高處不勝寒同低處不勝寒最大分別，係高處不勝寒嘅時候，指數同估值升得咁高都有人買股，皆因經濟環境好旺，環境睇落好好，大家感覺好易賺錢，而且明天仲會再好啲。喺咁嘅環境下，公司盈利可能已經走上頂峰，加上估值偏高，咁就變成高上加高，寒起上嚟就好勁。到投資者發現唔對路，想走番落山已經唔係咁易，結果有可能一坐艇就坐十年八年，最近期嘅例子就係2007年炒港股直通車，當時無論指數同估值都咁高，走避不及坐咗艇者，家捱價已經捱咗7年，但仲未返到家鄉。
至於低處不勝寒，雖然股市同低位升咗唔少，但估值始終唔算高，主要原因係實體經濟仲係探緊底，氣氛唔會令人咁有信心，股民多數係炒吓又睇吓，未敢全軍出擊，擺出十個前鋒的全攻型戰術。由於咁樣，就算市場吹吓冷風，股民多數都係傷風，唔會咁易肺炎入廠甚至無命。
流入資金仲未買晒嘢
講起股民未被勝利沖昏頭腦，陸羽仁同中環投行老友講起，佢都話最近呢排個市有錢入嚟，但大家買嘢唔係咁急，主要原因係新股發行唔係咁多，除了話上市公司招股唔係咁大型外，大公司批股、供股集資唔係咁多，所以仲未完全抽走流入的資金。部份有錢的基金、大戶就喺市場買吓嘢，正因為有佢哋喺度買嘢，個市變成累升咁多都唔跌得落，搞到個市好似有啲危危哋咁。
投行老友仲話，有人話個市高，奇怪係家好多平股無人買，佢形容成個中資金融股板塊都係大落後，好似上個星期公佈業績的中行(3988) ，收報3.67元，市盈率只有5.12倍，中期純利增長11%，雖然唔係咁勁，但都係有增長；佢同7年前創出的歷史高價5.06元仲差好遠，仲唔計佢呢幾年盈利增長咗。內銀股估值咁平，主要係外資擔心中國銀行體系爆煲，先唔講內地政府有無能力控制同保護金融體系，但如果內銀出咗事，港股固然無眼睇，全球金融體系肯定都波濤洶湧啦！從呢個角度睇，無理由其他地方股市估值咁高，內銀股就咁低喎。不過，投資市場唔係百分百理性嘅地方，啲錢有平嘢都唔吼，係都唔買內銀股，咁就幾抵買都無符，化而大之，所以有時炒股唔係只講平定貴，有時愈平愈無人買，愈貴就愈搶手。
個市究竟係咪位高勢危，抑或係股市比經濟走得前咗，應對方法係有分別。如果股市係一片樂觀，人人以為個市有金執，買股收息要成世先回到本，股民最聰明的做法，就係全線清貨，一股不留，然後死忍，直至個市大跌屍橫遍野先出嚟執平貨。
順勢而炒唔使急離場
要喺高位全線清貨，跟住睇人家賺錢忍住唔入市，絕對係好唔人道兼違反人性的行為，因為人係群體動物，要離群獨自行事唔係咁易，尤其係見到人哋炒股賺錢咁快樂的時候，所以要咁做，真係要睇得好清楚，有十足信心先好行動，否則清貨太早，忍到最後忍唔住入市，隨時就變成最後入市接火棒。
以家情況，個市距離炒到癲，要全線離場仲有距離，喺呢啲時候，投資者適宜順勢而炒，邊戰邊走，意思係家個市已經升咗唔少，當然唔適宜再擲大筆資金入市追貨，但同時手頭有貨者，都唔使急於沽晒佢博翻兜，比較穩妥嘅方法係個市升，就沽小小貨等自己開心吓，等佢跌番小小又入番，總之買賣唔使咁心急，有乜就等吓先，因為照睇個市仲有得熬吓，股民唔怕寒咪可以衝吓浪囉。
陸羽仁
金融High Tea 舊文
