【文亮言】希臘唔還錢其實已經很斯文（湯文亮）
希臘今日有十幾億短期貸款到期，總理齊普拉斯講到明冇錢還，銀行索性關門唔做生意，或者唔俾人攞錢，齊普拉斯對德國婆說，係銀行唔開門，LC到期兌現唔到，並非希臘賴債，在我們眼中，齊普拉斯強詞奪理，與賴債有什麼分別，但在德國婆眼中，齊普拉斯是相當斯文，
因為，德國在希特拉年代，借錢不但唔還， 仲派兵打債權人，甚至奪取那個國家，既然成為債權人國家的主子，當然唔使還錢。
在第二次世界大戰前，當德國發動閃撃戰，奪取波蘭，匈牙利，捷克等等國家時，蘇聯的物資仍源源不絕供應德國，直至希特拉知道自己冇錢還，在最後 一班蘇聯運輸火車進入德國境內之後，便封鎖關卡，向蘇聯宣戰，唔還錢仲打人，激到史太林紮紮跳，於是開戰，在二次大戰開始時，蘇聯的戰略物資大部份都俾曬德國，雖然兵源充沛，但武器不足，於是輸到仆直，如果唔係天氣寒冷，蘇聯已經唔存在，德國用來攻打蘇聯武器，是由蘇聯的物資製造，我講冇人會信，希特拉是向諸葛孔明偷師，草船借箭都是差不多同樣道理。
今日，德國婆心中有數，所以不斷呼籲齊普拉斯返回談判桌上，我估中最後的結果就是截息，減債，延期還款，甚 至再借多些款項給希臘，到那時候，他們就會說人道問題，所以，最後都搞掂。
大家唔好以為我作故仔，日本仔打珍珠港亦是冇錢還比美國 佬，於是派山本五十六炸珍珠港，目的令美國不能接濟蔣介石，只要三個月，日本仔深信可以淪陷整個中國，還錢俾美國佬的責任，就由中國人負責，誰不知惹惱羅 斯福，話你條日本仔唔還錢仲炸珍珠港，於是出兵，符符碌碌在中途島打到日本一仆一碌，日本的計劃才不能夠得逞。當時，德國與日本有一個共同之處，就是唔還 錢仲首先宣戰，所以，不但是債大無憂，而是欠人錢的人最大，債權人都要聽他們講，德國婆如果記得這段歷史，就應該睇開D，希臘的債務其實不多，撇撇嚇就冇，而日本人習慣篡改歷史，現在的日本人可能已經唔知道有這段歷史，不過，大家不用擔心美國，麥克阿瑟用咗六年時間，早已收回借出去的本金，至於利息，美 國仍然收緊。
香港財務公司就最叻，他們唔願意借錢俾大客戶，情願密食當三番，一個小債仔唔還錢，對財務公司影響唔會很大，希臘的債務對於德國來說，小事一樁而已，我相信希臘一定可以做武士，係最後冇事。
文亮言 - 湯文亮 舊文
