調整無大插
2016/05/24 09:09:08
網誌分類: 經濟
週一美股全日窄幅橫行，尾市輕輕微下挫。杜指收市跌8點，報17593點，標普500指數跌4點，收報2048點，納指跌4點至4766點。
指數無大跌，但睇股市恐懼指標VIX指數再升4%至15.82，3月初以來高位，顯示市場氣
氛麻麻，估計係與上周有多名聯儲官員猛講夏天加息係合理，更發出警告話投資者低估咗聯儲局在6月份會議上加息可能性的言論影響。不過，睇大市走勢，投資者係騰騰哋雞，又未至於腳都軟曬。
有好多分析認為，考慮到去年12月聯儲局首次加息以來，經濟形勢的變化以及投資者目前的倉位，美國股市和債市似乎能夠平穩消化聯儲局的下一次加息，市場不至於陷入動盪。主要原因係相比去年，目前的美元和油價的走勢都讓市場放心得多。
反映美元兌6隻主要貨幣匯率的美元指數，雖然已經連續反彈3個星期，昨夜日收95.25，但仍比起去年底時的98.63低3.4%；而油價受到森林大火及爆炸意外，由今年的低位反彈了超過80%！令到美國能源生產商財政壓力大減，油價唔出現暴跌，世界又會太平啲。即使加息油商都死唔去。
分析指出，導致今年年頭股市和債市大幅下跌的主要原因是，係投資者擔心美國經濟可能陷入衰退。但睇近期出爐經濟數字，無論係工業產值、房屋銷售和消費者價格等，都幾靚仔，反映美國經濟健康，呈現增長勢頭。由於美國通脹整體依然疲軟，可以預計聯儲局只能夠逐步加息。
而多數分析師亦認為，聯儲局只敢在充分暗示的情況下才加息行動。近期忽然有咁多聯儲局官員跳出來猛講加息，就可以理解了。不過，美國加息，對於那些利潤低迷和股價估值過高的股份，就要小心啦。
摩根富林明資產管理全球策略師曼德爾(Ben Mandel)表示，第一季度美國企業財報不佳，但可能已經觸底。而今年能源行業出現復蘇跡象，前景可能好轉。他認為美國股市的年回報率年底可能達到中個位數。至昨日，標準普爾500指數今年以來累計上漲了0.4%。
Sage Advisory Services創始人麥奎因(Mark MacQueen)表示，全球有大量資金正在追逐極少數的優質資產。而聯邦基金利率上調0.25，不會改變這一格局。他建議可以購買美國國債，不用太過擔心美國國債價格會因為加息而大幅下跌，原因係歐洲央行和日本央行為了提振經濟增長，已將利率下調至零以下，令到美國國債受到海外買家的追捧。
另外，睇美企發債情況最近有所提速，投資者唔再好似年初時候，因為擔心經濟前景，唔願意買債借錢畀企業。
上周，評級較低的戴爾(Dell)就成功發行200億美元投資級債券，係有記錄以來第四大公司債發行交易。與此同時，據美國商品期貨交易委員會資料顯示，截至5月17日，原油和長期美國國債看漲頭寸增加，看跌頭寸減少。反映市場對投資者對一些資產的態度更趨樂觀，市場人氣已變得比較積極。
Atlantic Trust Private Wealth Management首席投資長多納伯迪安(David Donabedian)更好樂觀咁話，任何拋售都將給許多投資者帶來撈底機會。當然，呢度有個前提，就係聯儲局加息步伐會極緩慢，至唔會導致股市「熊出沒」。
結論係加息會帶來股市調整，但不會大插。，
陸羽仁
回應(3) 我想回應
陸羽仁 BLOG 舊文
來源 source: http://blogcity.me
