滬港通首宗疑似敵購
2016年05月27日
港股彈咗一日成交又變番奀奀，但就頂住唔畀佢跌。大市成交去番唔夠五百億，大戶想話夾高質低話咁易，但咁嘅成交中長線就真係唔敢睇好住。
前日大升五百點後，港股一開即掉頭下跌，最多跌119點，低見20249點，但午後大市收復失地，
尾市曾升36點，恒指收報20397點，升29點；國企指數收報8526點，跌10點，成交金額464億元。油價近排呈強，布蘭特期油六個月內重返50美元大關，中石油(857) 漲0.38%，造5.35元；中海油(883) 彈2%，報9.37元；中石化(386) 升1.3%，造5.32元。本來市場估計中海油要為旗下石油資產撇帳，油價回升暫時解決咗呢個憂慮，不過，油價走高，加上人民幣下跌，變相質低航空股。國航(753) 跌1.88%，造5.23元；南方航空(1055) 挫4.18%，報4.58元；東方航空(670) 挫3.3%，報4.15元。
敏華送紅股又掂咗
昨日二、三線股嘅英雄係敏華控股(1999) ，佢績佳兼獲大行升目標價，股價破頂創上市新高，曾高見10.64元，飆7.3%，收造10.46元。敏華宣佈截至今年3月底止全年純利為13.27億元，按年升23.5%，花旗就發表報告，話佢業績優於預期，其中受惠毛利率增加3.9個百分點至39.5%，推動盈利上升。
主打傢俬出口嘅敏華，表現同美國地產市場有直接關係，美國4月新屋銷售數據佳，按年大升24%，有助集團產品在美國需求。內地也得益房地產市場交投回升，加上集團70%以美元收入為主，美元佔生產成本約50%，花旗相信是美元升值的受惠者。不過，我覺得炒高股價更直接因素，係佢一送一紅股，好多老散鍾意收紅股，佢業績對辦，再加埋呢招，結果咁就搞掂。
跟住講吓近日內地熱議一宗疑似深港通「敵意收購」事件，目標主角是神州控股(861，前稱神州數碼)。由聯想控股(3396) 分拆為獨立上市的IT分銷業務公司神州數碼，股權結構非常分散，原本的第一大股東為現任主席兼靈魂人物郭為，但他持股僅約8%。自3月以來，在深交所掛牌的廣東省國企、全國最大ATM生產商廣電運通(002152.SZ)，透過「滬港通」南下靜靜不斷吸納，近日因持股超過5%而曝光。截至上周五，廣電運通持股已達11%，超越郭為成為第一大獨立股東。
市值達29億港元的廣電運通，累計動用逾10億人民幣買入神州控股，同時還準備了約20億人民幣彈藥繼續掃貨。受此帶動。神控市值五、六十億港元，市場估計廣電運動不難收集到三至四成股權。由於郭為表明事前不知道廣電運通密密買股的行動，而且神州控股本身亦有經營ATM業務，雙方存在競爭關係，令市場覺得是疑似敵意收購。
神州資源攀升搶眼球
睇番資料，神州資源現價市盈率9.1倍、市帳率低於1倍，該公司業務包括IT分銷業務轉型，涉及大數據、FinTech、雲端系統等內地流行的大熱概念，所以相當吸引對科企認識較深的A股投資者。有內媒甚至認為，在眼下的A股市場，一家公司只要具備其中一項概念，不必有任何業績，市值已可炒至逾百億元。就以廣電運通為例，本身是全國最大ATM生產商，算是傳統製造業公司，現價市盈率約23倍，若能花數十億元入主神州數碼，用高市盈率融資收購低市盈率的神州資源，條數計得過。昨日下午神州資源股價再起動，收市升成5.6%，收報5.6元，走勢好搶眼球。
陸羽仁
金融High Tea 舊文
來源 source: http://hdfin.stheadline.com
