中環在線：擺花街舖減租
基仔一年收少22萬
■古巨基（右圖）持有擺花街22號地舖，最近減租兩成租予新租客。
中環擺花街本來只係一條二、三線街，唔算好旺，約喺4、5年前，舖租高𥧌時，先後獲藝人謝霆鋒、古巨基同賭王四太梁安琪掃入舖位之後，就俾人標籤為「名人街」。不過，名人業主都敵不過經濟
下滑、零售市道差，擺花街家陣好多吉舖，連古巨基都要減租近兩成。
古巨基持有擺花街22號地舖，家陣個時裝店租客3年前開始租，租約明年到期，頂唔住生意轉差，要提早一年走人。舖位剛以月租8萬蚊，租畀化妝品店，古巨基每月收少1.8萬租，一年收少22萬呀，認真陰功豬。
古巨基噚日大方回應話，整體經濟大環境都係下跌，所以舖租上都要調整一下，等租客冇咁大壓力。咁都啱嘅，家陣人人都話要共度時艱，而且，古巨基個舖有租收好過丟空喇。
霆鋒舖位冇人吼
須知道隔籬少少，謝霆鋒喺擺花街26號都持有一個地舖，佢最近減租都租唔出，直情係慘慘豬！謝霆鋒呢個舖原本由鞋店租落，上個月完約之後冇續租，家陣叫租減到16萬，平過舊租兩成仲係擺喺度。
睇番資料，謝霆鋒2013年初買入呢個舖，作價1.17億元，就算成功以16萬元租出，回報率都只係得1.6厘咋。𠵱家呢個市道，難再高價放售舖位，有租收都要還神。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
