Money Walker：
裁員潮下的救命符
■一些被視為無用的嗜好如美甲等，在賺錢方面不一定輸給一紙文憑。 資料圖片
日前與一位前輩傾偈，對方慨嘆以前在職青年會不斷進修，反觀呢一代嘅年輕人就較著重追求興趣同吃喝玩樂。撇開世代之爭不談，筆者就覺得呢一代嘅年輕人其實有為
自己嘅未來打算，只係並非依循上一輩嘅方式。
多年前社會曾興起自我增值風潮，在職者積極報課程拎沙紙提升競爭力，但風氣早已沉寂。有人話係因為𠵱家嘅企業對提拔員工態度吝嗇，辛苦完成課程後回報欠奉，導致年輕人自我增值動力大減，亦有人話近年學費升幅驚人，想讀多啲書都有心無力，更加唔好講好多課程都良莠不齊，讀完學到條毛。
話說回來，究竟要學識乜嘢技能先可以喺社會搵到食，從來都係估佢唔到。放工後part time進修再非為前途鋪路唯一途徑，廢青打機打到去拍片搵錢，畫畫叻者化身美甲師，DIY手工皂發展到開班賺學費等，先例不少，一啲你以為冇鬼用嘥時間嘅嗜好，有時喺搵真銀方面反而唔輸畀一紙文憑。
有人會話潮流嘅嘢總有一日會out，識呢啲嘢都幫唔到自己長期搵食，邊及一面返工一面讀多幾張沙紙咁可靠。但筆者相信，只要掌握到呢啲範疇背後涉及嘅技能，喺潮流變遷下亦可搵到生存空間。好似拍打機片咁，唔係淨係識打機就拍得好睇，仲要識搞氣氛、控制時間、識做剪接同後期效果等，呢啲技能放諸其他範疇亦有用處，例如市場推廣、電視節目製作等。
筆者唔係否定讀書進修嘅價值，亦贊同基本學歷點都要具備，只係認為進修並非在職者提升自己唯一途徑。畢竟唔係人人都啱做管理層或專業人士，尤其是喺香港產業缺乏多元化嘅困局下，好多行業都缺乏向上流動空間，有料都未必有位，要開創事業，突破傳統地走一條不一樣嘅路，隨時較一味進修博升職更易成功，甚至可成為裁員潮下嘅一道救命符。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
