財經評論：廉航真的便宜嗎？
■現時眾多廉航提供平價機票，不過消費者買之前要想清楚是否適合自己。 資料圖片
日前香港又打8號波，打工仔就開心啦，有半日假。不過暑假要去旅行嘅朋友仔就慘慘豬，飛唔到之餘，仲可能求助無門。係呀，我係講緊買咗廉航嘅朋友仔。
廉航有幾平，有幾「抵」，應該就唔使我話你知，但你
哋買之前有無停一停，諗一諗，計計數先？就以𠵱家暑假旺季嚟講，閒閒地都要接近成千蚊一張機票，仲未連稅，又要加埋行李費，嗰到夾夾埋埋，個價錢隨時拍得住傳統航空公司。
萬一唔好彩，好似前幾日打風咁，搭廉航除咗要面對滯留機場無人理、無酒店、無餐飲提供之外，最慘嘅情況，就係要另外買多張機票返香港。有買旅遊保就話有得claim，萬一冇買嘅話，就真係又破財，所以有時買廉航都唔係好抵。
不過有時又要喺人哋到諗嚇，廉航都要賺錢，人哋有咁平嘅機票，其實有好多服務都未能提供到，同埋話明廉航，成本嘅嘢，就梗係cut得就cut。至於服務，有嗰啲叫bonus，唔係叫must囉。
其實𠵱家航空公司嘅機票，淡季嗰陣都會提供好多唔同嘅優惠，分分鐘仲抵過買廉航，所以各位鍾意旅行嘅香港人，買機票前真係要停一停，諗一諗，計計數，廉航嘅平機票係咪啱你嘅要求，計啱數先買，咁咪唔使傷荷包之餘又勞氣囉。
記者：何紫恩
財經評論 舊文
來源 source: http://hk.apple.nextmedia.com
