一路一帶：
周日投票 為自己未來投資
■請以一張立法會選票，為香港未來四年「投資」。 資料圖片
執筆之時，正值「人大831」落閘方案兩周年，人大常委在2014年粗暴幹預香港特首選舉，定下「831框架」，令特首候選人要由小圈子的1,200名選委提名過半數才能出閘，直接否決了香港人真普選的
需求。中央「明張目膽」搶咗你張特首選票，你更加要把握餘下嘅一張立法會選票，為香港未來四年「投資」，同時向北京說不。
立法會投票就像投資一樣，為自己、為香港未來四年做一個投資，而且是避險投資、長期投資，英國脫歐結果公佈後，都只係兩年後就正式脫離歐盟，投資者要避險要觀望都只係短短24個月，但立法會嘅投資就長一倍時間，「投資者」要更加審慎去選擇，呢項投資冇得避。假如你選擇唔理會，諗住當將舊錢放喺銀行會好安全，一樣被「銀行」收費扣到血本無歸！投票揀議員，就好似選擇你嘅基金經理，或者保險經紀一樣。假如你出咗意外，稱職嘅保險經紀會幫你跟單，搵間好醫院同病房，打點一切，唔需要擔心使費同負擔；萬一遇到差嘅經紀，分分鐘累到你醫生都冇得睇，更黑仔嘅係，經紀好似湯家驊咁突「轉工」或唔撈，由外資公司跳去中資公司咁，你張單更可能變成孤兒單，你嘅訴求猶如石沉大海，得唔到回覆。
揀好一名「基金經理」，除咗喺牛市時賺大錢，更重要喺在逆市時幫你將風險減到最低，就好似英國脫歐時，會將資產由股市轉去黃金避險一樣，當面對「廿三條」等洪水猛獸時，稱職嘅基金經理自然會幫你見招拆招；不稱職嘅經理，淨係收取昂貴嘅管理費都蝕到入肉，冇理由明知中央政府要眨值救市，你仲大手買入人民幣啫！
假如冇議員幫你操陀，就像輕舟遇到驚逃駭浪，隨時人仰船翻。各位投票者，不妨想像嚇，每年收到稅局嘅綠信封，再想像嚇一直超支的高鐵撥款、「港豬澳大橋」同埋林林種種嘅大白象工程，就明白選個啱嘅議員係幾咁重要，千祈唔好抱僥倖心態。政府同馬一樣，需要鞭策，否則就好似東隧一樣，即使政府回收咗都唔會減價，解決唔到塞車問題。
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2016年9月1日 舊文
來源 source: http://hk.apple.nextmedia.com
