【不問價追】季結的章法 （小炒王梁心欣）（第91期）
2016-9-25 18:00:22
九月份大市行得總算順利，最慘都係經歷過大跌800點嘅一日，其餘日子有北水拱照，市況尚算平穩樂觀，搵到餐晏仔。臨近第三季季結，基金最後點樣部署，先係致勝關鍵。由八月尾開始，小炒王叫
大家「buy and hold」，持有比短炒更為實際，好多心急嘅朋友喺小炒王Facebook 留言，問我隻股要唔要沽，我特登押後幾日先至答，等佢哋清醒一下，知道乜嘢叫「buy and hold」，結果股價調整幾日後又再衝穿高位，例如理文造紙（02314.HK）、海信科龍（00921.HK）、金山（03888.HK）我都一直堅守落去，因為冷靜對待方為上策，咁九月尾，又應該用咩章法？
執筆此刻，聯儲局仍然未開議息會議，即係加唔加息我都未知，只可以講，若然加息市場會認為係消除不明朗因素，萬一唔加，市場又定性為臨近美國總統大選市場實應按兵不動。所以加息與否都唔係呢篇文嘅重點，反而係基金股喺九月中旬開始異動，我哋應該捉實呢條尾巴炒到九月尾。依家上述提及的三隻股分都係基金股，理應持有到月尾，而近日家電板塊異動，創維數碼（00751.HK）屬基金股之列，股價開始由低位回升，應該順勢跟炒。科網軟件又係要捉實，總之買中價基金股勝算較高。
咁10月份呢？好早之前小炒王已經驚定先，一來嘅美國總統大選共和黨嘅特朗普會領先，搞到世界大亂，因為每人一票嘅嘢非常之難斷定（正如英國脫歐公投一樣），既然要估計，就係最深不見底嘅事，小炒王寧願避一避，走為上著，留返一堆現金暖肚。仲有呢件大事件，非常之少人提及，就係內地嘅「六中全會」，究竟中央嘅政治角力去到咩地步？甚至內地經濟前景點睇？六中全會都會有啟示。但觀乎9月中，內地兩地股市成交超薄，我就知道六中全會依然存在不確定性。若然係容易睇的話，大媽大叔一早押注，唔使等你同我，所以10月份應該小心為上，保本重要。
不問價追 - 小炒王梁心欣 舊文
來源 source: http://www.winmoney.hk
