見美女唔介意佢整容
2016年09月02日
大市呢排有兩個火車頭係銀行股，藍籌銀行同內銀各有捧場客，話題之一係滬港通南下資金鍾意買乜，數字顯示，滙控(005) 係佢地嘅至愛，加上美國話加息都係炒緊銀行股，所以大笨象有市場。
至於最近資金流入內銀，建行(939) 成為新寵。將滙控
同內銀比，滙控優點係大件，股價低過帳面價之餘，派息都唔錯，但若論抵食，咁就唔夠內銀嘞，因為內銀市盈率更低，而且息率都好高。兩者分別反而係資產質素，滙控嘅生意係國際化，美元或外幣資產為主，內銀係人仔資產為主。南下資金買滙控，除左佢大件之外，最重要係佢有保險作用，可以分散投資，減輕內地政治經濟同人仔匯價風險。
掉轉嚟講，內銀因為內地經濟前景不明朗，加埋人仔有貶值壓力，令佢地股價長期不振，但最近佢地公佈出嚟嘅業績，雖然個個都係升1%，有少少韓國美女那種味道，但點都叫做撐住盈利，見人係美女就唔好計較人地整容，股民心態亦好現實，令到呢類股份成為「抵食之王」，賣點係估值最低嘅金融股。
大新金融會派特息
除左跨國嘅滙控同內銀，當然仲有第三類選擇，就係本地銀行股。昨日大新金融(440) 升勢唔錯，佢同中銀香港一樣，係有賣產息嘅概念。大新金融早排公佈截至6月底止中期盈利按年跌14.9%，至9.14億元；每股盈利2.73元，中期息每股0.29元。佢盈利下跌主要係屬下銀行賺少左錢，所以公佈後股價一度下跌，不過，大新金融6月宣佈與福建泰禾投資達成協議，以80億元出售其港澳壽險業務。
據佢屬下嘅大新銀行(2356) 董事總經理王祖興表示，大新金融出售大新人壽將獲得利潤逾40億元，董事會擬派特別股息回饋股東，但交易仍有待股東及監管機構批准，至於從有關收益中撥出多少用作派發特別股息，亦要等董事會決定。O依家大新金融市值約180億元，股價53.95元，出售人壽業務套現超過每股20元，其中有一半係盈利，即係如果盡派盈利可以每股派10元，由於控股公司坐擁巨資回報有限，就算唔派晒都應該派番咁上下，令股東可以自由運用資金，又或者學吓滙控用啲資金回購，咁就一家便宜兩家着。
至於大新銀行，另外同買家簽署15年期的獨家銀保分銷協議，大新銀行將可收取26億元，呢個都係利好消息。大新銀行O依家息率只有2.6厘，從銀行股角度唔算高息，但本地銀行身價一向較貴，呢個先係佢嘅價值所在，所以若想買銀行股，其各有唔同質地，想搵食就要按自己喜好揀嘞。
內地股市又有壓力
內地官方PMI重返擴張水平，但在石油、地產、金融股領跌下，內地股市尾市急墜，收跌0.7%。恒指仍能夠先低後高，一度觸及今年高位23193點。恒指收報23162點，漲185點或0.81%；國企指數收報9606點，漲64點或0.67%，成交金額713.68億元。滙控呢排認真威，再度成為帶領大市向上的功臣，推動恒指65點升幅，收造59.1元，升2.8%；渣打亦升2%收66.1元。
澳門8月份博彩收入188.36億澳門元，按年升1.1%，為2014年5月以來首度回升，帶挈濠賭股普遍造好。金沙(1928) 升6.4%，造32.45元；銀河娛樂(027) 飆8%，造27.3元，銀娛與金沙為升幅最大的藍籌；新濠(200) 飆8.4%，造8.69元；永利澳門(1128) 升7.2%，造11.58元；澳博(880) 升6.4%，造5.19元。摩根大通發表報告表示，澳門8月博彩收入188億澳門元，按年升1%，按月升6%，以按年率計是27個月來首度回升，此優於市場預期，原料按年跌1.5%，於是濠賭股又炒吓見底。
陸羽仁
金融High Tea 舊文
來源 source: http://hdfin.stheadline.com
