【實力取勝】港股A股化 老千股冇得向下炒（陳承龍）（第93期）
2016-10-9 18:00:21
話咁快又10月，原本上期封面故事想做港股第4季預測，但又畀我哋搵到正與西伯利亞礦業（01142.HK）公司管理層搞抗爭的小股東，所以最後抽起了預定的故仔，改咗做1142個故仔
。不過，如果上期出返今期嘅第4季預測故仔，可能仲正，因為我哋嘅重心會擺曬喺啲毫子股身上，有冇發現近日不少毫子都炒起咗，最經典有易大宗（01733.HK）（前稱永暉），仲有隻蒙古焦煤（00975.HK），呢兩隻市值一啲都唔細，但勝在係毫子股，所以近日幅圖斜上好緊要，而我哋已發覺呢個跡象有蔓延開去嘅情況，所以趁啲毫子股仲未爆升前，執一批看門口等爆升，精選毫子股可睇今期封面故事。
講真，我覺得第4季炒返啲股仔係相當合理，因為個恒指已升咗幾千點，全部挾啲大股，連我哋殼股策略王喺過去一段時間都介紹滙豐（00005.HK）及騰訊（00700.HK）呢類重磅股，當然，我未覺得呢批大股升完，我只係覺得佢哋要抖抖，啲資金換入呢批靜咗好耐嘅細價股。事實上，呢批細價股有好多都好平，根本已經跌唔落，跌唔落咪唯有掉轉頭炒返上去。更重要嘅，面價細，但市值大喺當今市場係有好大優勢，就可以博懵入深港通，從1733同975呢兩隻例子已可見一斑，所以中長線，我估計好多細價股以後唔會再向下炒。
除咗深港通呢一個誘因外，更重要嘅係要多謝港交所（00388.HK）。可能太多內地股民反映過香港太多老千股，所以港交所做嘢，所有嗰啲配股集資活動都比以前難，聽講，如果上市公司仲有Cash，就唔畀亂用授權配股，甚至供股，既然難有新股印出來掟，大戶唯有掉轉頭砌上去慢慢散貨好過，呢啲咪好明顯嘅A股化囉，內地都好難做到發行新股，喺冇新股供應下，股價咪係咁狂挾，香港都開始係咁。
仲有一樣嘢值得留意，有冇發現近年好多新股上市嘅細價股，好似震昇（02277.HK），又或者天寶（001979.HK）呢類半新股，早段冇乜表現，甚至跌穿招股價，但經過一輪收集期後，就越升越高，天寶就最佳例子，0.55元招股價，最低挫過去0.3元水平，但收一輪之後就係咁升，依家已較招股價升超過兩倍。其實好多隻都係咁，手法好內地啲大戶手法，所以喺可見將來，港股將成為內地炒家大戶的炒賣樂園，所以不妨一籃子儲落一批細價毫子股，呢啲正正是內地炒家最愛的入手對象。
如果要我揀一隻，我會揀隻錦興（00275.HK），一來又係毫子股，市值唔算大，但又唔算細，都有廿幾市值，最關鍵係佢資產值高，有成4蚊樓上，喺有9成折讓嘅大前提下，再加上公司正染指內地地產及科技業務，正正合內地大戶炒家的口味，所以此股我會睇佢以倍計上升，趁未真正開車，一於儲返啲貨啦。
實力取勝 - 陳承龍 舊文
來源 source: http://www.winmoney.hk
