【不問價追】下隻102（小炒王梁心欣）（第93期）
2016-10-9 18:00:11
先跟進嚇隻凱升（00102.HK），8月16號喺《小炒王國》同大家推介，當時價錢係$1.78，經過一個半月，凱升最高升到$3.19，升幅達到八成。以時間、幅度來計，凱升已經做出身價
了。較可惜，係小炒王無喺$3樓上叫大家食胡（連自己都錯失機會），算係冇食盡升浪。咁現時仲加唔加注，我覺得不如尋找下隻102好過。
上次睇中102，完全係睇中個趨勢。行業反彈，股價低殘，用同一樣嘅模式再次尋找下隻股份，相信佢就係秦港股份（03369.HK）。
離開數碼電台之後，第一次到新城財經台同大家推介股份，我揀咗煤股。我深信好多位聽眾，或者讀者都諗唔明點解我要揀煤股。
長氣啲睇返啲數據，自8月中旬開始，環渤海動力煤價格已經升勢淩厲，單周升幅一度突破指數發布以來的最高水平。9月尾，秦皇島港煤價繼續全面爆上，環渤海動力煤價格指數收報561元/噸，按周升咗7蚊。睇落幾蚊好少，但由年頭至今，三季累積升幅有四成，大趨勢已經出咗嚟，接著落嚟進入冬天，煤炭需求增強，相信價格上升會持續。數據打咗底，其實同102一樣，行業見底，基金找緊機會進場，極其量我們都係跟順風車而已。
2013年12月上市嘅秦港股份，招股價係$5.25。三年嘅主板之路冇好過，一到跌到落$1.72，足足唔見咗三分之二，剛巧又同102一樣，由$5跌落嚟，跌到無人信之後強勁反彈，咁今次預秦港升到$3，50%止步係咪好克制呢？中國有三大煤炭運輸通道，包括大秦線、神朔黃線、蒙冀線。三條主線，秦港都有業務在此，萬一行業觸底，大包圍乜都有的公司自然最受惠。最新，首長國際（00697.HK）向母公司出售秦皇島業務，股價向上，其實係反映佢將債務轉移，令自己債務減輕。股價微升可以理解，但升幅兩成其實係表示基金對整個行業的睇法轉向，易大宗（01733.HK）、蒙焦媒企（00975.HK），基本因素欠奉的都在九月升兩倍，相信秦港都係時候追落後。
短期的黑天鵝係英國啟動脫歐程序，到底如何影響大市？奉勸大家繼續炒股不炒市。
不問價追 - 小炒王梁心欣 舊文
來源 source: http://www.winmoney.hk
