自成一格：
平靚正都冇人吼？
■華為嘅硬件其實唔差，但就衰在係國產品牌。 資料圖片
上星期越野兔同幾個電訊業朋友食飯，當然少不免講到各大手機品牌近排有咩搞作；原本大家一致睇好三星Note7有望再起熱潮，不過𠵱家得番過熱同爆炸，加上三星事後處理手法超差，令大家失曬信心。
香港人揀手機
一定是品牌行先，離不開蘋果及三星等國際知名品牌，睇唔起國產牌子。所以華為、Vivo在香港市場撈極都唔掂，就算呢啲牌子已經成功走進國際舞台，但香港人一句「cheap！最憎大陸牌子！」就已經無得搞。
其實不少國產牌子已經走出了左抄右抄的山寨機行列，開始與國際大廠合作出手機。華為近年好勇猛，接二連三泊到好碼頭，去年與Google合作推出Nexus系列手機Nexus6P；而今年推出的P9，亦是全球首部與德國老牌相機廠Leica共同研發嘅智能手機，單單計個鏡頭都靚過啲大牌子幾條街，零售價只不過是4,000幾蚊。
只要畀蔗渣嘅價錢，就可以有燒鵝味道，超值！不少業內人士都大讚好用，可惜銷情麻麻。衰啲乜？一定係「華為」呢兩個字囉，如果換個三星logo落去，呢個價錢加呢個質素，性價比超高，肯定大賣特賣！
港人忌諱國產品牌，除咗覺得cheap之外，另外安全性亦都係一個重要因素。你知啦，內地監聽或竊取個人資料有幾出奇，早前烏坎村事件都是騰訊（700）的微信出賣記者藏身地點先俾公安搵到。咁到底帶住國產機危險啲，定裝個國/pp危險啲，我已經睇唔透。
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com
