財經評論：
劏房越劏越細 肥啲都住唔到
■南昌一號四房戶其中一房，身高4.99呎嘅記者伸直曬個人，只剩少少位。 資料圖片
以前買樓要睇size夠唔夠大，啱唔啱用；𠵱家買樓都要睇size，不過就係掉番轉，睇嚇自己個size夠唔夠細，塞唔塞得落呀。
最近發展商開嘅則，已經唔係叫「奇則」，升leve
l叫「神則」。有幾「神」？先講四叔嗰兩個盤，一個加多利軒，嗰個閂唔到門嘅廁所，真係隻腳長多兩吋，閂咗門都要頂住呀……人哋話個玻璃門係沖涼嗰陣先閂埋，平時去廁所係閂浴室道門，仲話參考好多酒店嘅設計㗎。嘩，真係唔該曬喎，以前買樓要有家的感覺，但𠵱家發展商嘅設計話畀你知，買樓要有住酒店嘅感覺，酒店都唔只190呎啦（膠囊除外），又唔見你開大啲。
另一個南昌一號595呎劏四間房，最細嗰間房得44呎，坐監嘅人均標準空間都49.5呎啦，瞓嗰間房真係仲慘過坐監囉。不過講到明係「神則」，最「神」嘅就梗係396呎劏三房，其中一間仲要得37呎，即係有幾大？都幾大㗎，最少我嗰個4.99呎高嘅同事瞓落去，都仲有少少位剩，不過同事想喺間房拉嚇筋、做嚇瑜伽就頂住曬囉。人哋個設計剩係畀你瞓，搞咁多嘢做咩啫。都話南昌一號幾有人性㗎啦，點有人性法？咪就係話你知，高過5呎唔好瞓嗰間房囉。
其實啲新盤真係好鼓勵較肥嘅朋友減嚇肥，就好似田少家族旗下嘅何文田The Argyle，其中一個三房單位，最細嗰間房得30呎，一拉張單人床出嚟，咩位都冇曬，撼贏曬四叔啲「神則」。佢仲有個「賣點」，就係套廁除咗有淋浴間，仲有個超大型洗手盤……係浴缸先啱，佢個size係2.3呎乘1.8呎，深2呎幾。簡單啲講，即係小朋友之外，其他人都唔使旨意浸曬全身。浸浴都係想放鬆嚇啫，佢咁嘅size，浸又浸唔曬全身，伸腳又頂住曬，坐落去仲有侷促嘅感覺，肥多少少都未必坐得落，咁浸嚟做乜？
所以話，𠵱家買樓或租樓之前，除咗睇你有冇錢之外，仲要睇埋你個身型，又高又肥又大隻嗰啲，有錢又點，啲單位塞得落咩？
記者：何紫恩
財經評論 舊文
來源 source: http://hk.apple.nextmedia.com
