【不問價追】Lemon（小炒王梁心欣）（第99期）
2016-11-20 15:00:02
近日在報章上留意到一則新聞關於「檸檬」，我即時大感興趣，仔細咀嚼。有人以酒為樂、以啡為伴，但好多香港人都愛以檸檬茶做主餐飲品，我係其中之一。猶記得，我曾經到美國紐約旅遊一個月，無
嘢我唔適應，只係突然有一日坐立不安，於是衝去唐人街飲一杯疑似的港式檸檬茶，結果身心舒暢。
篇新聞以檸檬比喻人生。「假如生命是一個檸檬，你會覺得點？檸檬的特色又酸又苦，無人鍾意吞下整個檸檬，但係將檸檬榨成汁，加水加糖，就人人都愛飲。人生原本就充滿酸苦，似足檸檬，要靠自己雙手作出變化加入真義，咁先為人生添上色彩。佢仲話，好飲的檸檬汁，是不斷擠壓檸檬的結果。上天總會不斷出難題壓榨你，面對逆境，一定要自己諗辦法。」估唔到檸檬可以比喻人生，我人生中不可或缺的檸檬原來有咁深層的意義。
但檸檬令我印象最深的故事是充滿陰暗面的。還記得中學時期讀歷史，老師通常用故事吸引大家去參透課本的資料。「納粹德軍當年捉咗他國的士兵作俘虜，其中一項嚴刑，就係矇著佢哋雙眼，以不同的事物改變或入侵其意志，影響思維。當中一項就係檸檬，德軍向俘虜表示，將會以整個檸檬放入佢哋個口，結果，檸檬未放，俘虜們口水分泌大增，如同已吃檸檬一樣。」
聽呢個故事，有個秘訣，是必須合上眼睛，你會即時感受到當時的俘虜是如何生活。
老師講的故事寓意我已雙倍奉還，只是對整個故事留下深刻印象，仲常常用此警剔自己。有時，市場充滿迷霧，買定賣存在極多不確定性時，我都合上眼，再重溫檸檬的故事，我好幸運，眼睛無被蒙蔽，對周遭的資訊都可以認真求證，差異只在於眼光以及對事件的認知度。所以「走油」、去除市場雜音是小炒王其中一個座右銘，因為大部分認為對的，未必完全正確，認為錯的，亦未至於錯到盡，保持自己的想法，是市場上的生存之道，共勉之。
不問價追 - 小炒王梁心欣 舊文
來源 source: http://www.winmoney.hk
