想賺錢 起商廈
2016年11月24日
港股反彈一日後，昨日先升後回，跌幅唔算太多。美國股市前晚創新高，但港股無法跟升，主要係大家覺得美國好大機會加息，人仔再向下尋底。雖然美息向上已成定局，但啟德首幅商業地開標，由稀客利福國際(1212) 投得，反映財團對商廈仍然有信心。
現金流勁 利福重錘投地
今次政
府推出的啟德商業用地，利福以73.88億元擊敗其餘七家發展商投得，每呎樓面地價6732元，呢個價錢比之前海航集團投得嘅住宅地平好多，但已是2015年1月領展(823) 及南豐投得觀塘海濱道77號項目之後的九龍東商用地皮新高。呢個項目可建樓面面積約110萬方呎，可建雙子塔式商廈，市場估值約65.8億至104.2億元，每方呎樓面地價約6000元至9500元，利福能夠中標應該唔算買貴貨。政府早前推出住宅辣招稅，加埋美息向上，可能都令投標者採取穩紮穩打策略，令利福可以突圍而出。
今次投得地皮的利福，主力經營崇光百貨，其後在內地有投資地產，並且分拆地產公司上市。崇光在銅鑼灣的總店是內地客來港購物「朝聖」地點之一，近年再進軍九龍。睇番公司資料，佢過去五年手頭流動資金有百幾億元，加上主要股東背景強勁，投個百零億嘅商廈項目絕對有能力。喺香港做生意，過去幾十年成功方程式都係做成功一門現金生意，賺取第一桶金，然後進軍地產，實行錢搵錢。無論係做實業、零售、旅遊都係一樣，啟德係新發展區，加上鄰近觀塘，故此吸引財團入標，O依家好多內地財團想落嚟香港買成幢嘅商廈，所以呢個項目應該長短棍都得。
大市方面，恒指周三靠多隻重磅內銀股造好，開市早段曾突破100天線，其後一度高見22804點，升幅達126點，無奈臨近收市轉升為跌。恒指收報22676點，僅跌1點；國企指數收報9665點，漲14點，成交金額608億元。
零售股靠特息護價
中資金融股繼續跑贏大市，建行(939) 、工行(1398) 及中行(3988) 三大重磅內銀股力撐大市，其中建行走高1.42%，報5.7元；工行升0.87%，報4.64元；中行亦漲0.88%，報3.46元。
市傳伊朗和伊拉克堅持不減產，意味石油輸出國組織(OPEC)本月底很大機會不能就減產達成共識，國際油價或受壓，「三桶油」個別發展，中海油(883) 跌0.78%，報10.16元；中石油(857) 跌0.19%，報5.39元；中石化(386) 升0.18%，報5.45元，油價唔似會大跌，但減產推高油價仲未係咁易，三桶油最宜炒上落，如果睇好油價會受惠美國推動經濟加溫，就可以放多啲力吼住低吸中海油。
另一個近日熱炒旅業見底嘅板塊係濠賭股，美高梅(2282) 、永利(1128) 都升咗1.9%。除咗濠賭股，呢期好多做自由行生意嘅零售股興派特別息，莎莎國際(178) 喺9月30日止6個月中期業績，溢利9598萬元，雖然倒退37.3%，每股基本盈利只有3.3仙，但公司照派中期息每股5仙，另派特別息每股4仙。莎莎收報3.46元，升咗4.2%。同樣宣佈有特別息派嘅周大福(1929) ，佢中期純利12.22億元，按年下跌21.55%，每股盈利0.122元，中期息0.06元，另派特別息0.15元，合共派息0.21元，即係派息多過賺錢。
主席鄭家純出嚟仲話最壞時間已過，即刻谷漲咗股價8.8%，報6.31元。零售股喺市旺時賺錢唔少，好多都手頭有銀，咁派住多啲息頂吓個價無可厚非。至於生意係咪見底，就要八仙過海、各自修行嘞。
陸羽仁
金融High Tea 舊文
來源 source: http://hdfin.stheadline.com
