不問價追 - 小炒王梁心欣 2017年1月22日
【不問價追】投資秘笈（小炒王梁心欣）（第108期）
2017-1-22 14:00:35
呢本秘笈唔使做任何嘢都有得睇，問題在於你會不會謹記在心。
成本秘笈得三句。
1/要預測未來息口走勢，世上只有貴金屬交易員最準
2/不用了解全世界的東西，反而將力量花在世界的big player身上
3/愈doesn’t make sense 的事情，往往才是機會
Woo，睇完係咪唔明呢？逐一解釋。
首先，呢三點係由小炒王近來好鍾意的人物Tim Ferris （上網搵下佢的資料，在美國超級受歡迎）所引領出來。佢現時主打一個pop cast, 每次都請不同嘅嘉賓到場，今次請來一位基金經理。
基金經理一出場就語出驚人，佢話：「希望每個人都好似積羅素一樣。」佢話每一次見到積羅素呢種狗，佢都非常之有活力兼且覺得世界好有新鮮感，佢希望每一個人都能夠做到同樣嘅嘢。
佢係Adam Robinson。
佢出名之處，並非投資了得，而是擊潰了SAT的考試制度，佢著作<The Sat: Cracking the system >迫到SAT要改制，你話傳唔傳奇？
投資嘅人離不開炒大市、炒個股、炒匯市，至於商品投資，包括軟性商品、農產品、貴金屬、石油乜都有得操作，但佢就話無人能夠比貴金屬嘅交易員睇得更清楚利率走勢。就算係我哋經常睇嘅利率期貨，都未必能夠作準。佢話適逢聯儲局將會加息三次，就睇嚇貴金屬交易員的預測準唔準確，以上係佢做咗幾十年基金經理所累積嘅經驗。
第二點，佢話你唔使學曬全世界嘅嘢先至走去投資，因為基本上人類學到全世界嘅東西大約1%已經好多。佢解釋作為人類，你冇可能學曬所有嘅嘢，記曬所有嘅歷史，所以花心機去尋找世界上千千萬萬嘅知識係浪費力氣，反而將心機花係世界上嘅大戶身上尋找大戶思維，跟佢哋嘅步伐去投資咁先至會令自己得著更多。
第三點，呢點令我最深刻。當你見到嘅事情不合常理，佢反而係機會。點樣理解？你會話：「唓！」即係行相反理論啦，好容易，但好多事情「非東即西」也未必啱嘅。最直接同你講「脫歐」、「特朗普當選美國總統」你會話，唔係佢贏就希拉里贏架啦，英國唔脫歐就即係留歐啦！呢個例子幫你唔到，試諗下在大台的某位演員，你估佢一路都係做二打六，點知經過一套內地嘅電視劇，佢就爆紅。你心入邊會諗”it doesn’t make sense “但當你再諗” it doesn’t make sense “佢就紅到住紅山半島。如果呢個藝人係一隻股票，佢就爆冷挾咗上去成10倍，咁你就真係一鋪清袋！
當世界出現一啲不合情理嘅事情，千萬要問自己究竟呢個係咪機會？唔好比一群人嘅諗法影響到自己。呢個係我從Adam身上學到最好的理念。年近歲晚，大家試下改變以往的投資習慣，話唔定有新領會。
不問價追 - 小炒王梁心欣 舊文
來源 source: http://www.winmoney.hk
