收市閒情：
商台叱吒七大預言
■叱吒頒獎禮實會有「雞蛋」，而今年就係鄭欣宜。 資料圖片
每年1月1號睇叱吒，係一種情意結，邊個拎獎邊個喊關你鬼事？不過呢幾年睇叱吒，望住台上啲歌星，就好似拜年見親戚咁，幾熟口面，不過好多名都叫唔出，只係咁意去嚇啦。下年叱吒會點玩其實預計到：
（1）只要
你聽過嘅歌，全部會入「叱吒十大」！聽過嘅歌可能佔6首，未必知歌名，但唱到時會叫：「呀！呢隻我識！」另有一至兩首歌，你好似有啲印象；剩低嘅係你聽都未聽過。
（2）一定會有雞蛋。有矛盾就有收視。𠵱家全球興對立，商台亦捉緊潮流，將歌手分為高牆同雞蛋兩派，雞蛋一定會贏！今年嘅「雞蛋」係欣宜，下年？佢做咗「女神」㗎喇，變成高牆，光環當然會掉下來。
（3）坤哥變番「雞蛋」。坤哥上年係「雞蛋」，今年變「高牆」。不過放心，香港根本冇星，下年拍硬檔做番「雞蛋」。另外，相信坤哥今年一定有一首歌，以「雞蛋」做theme。
（4）「獨立樂隊」湧出嚟。商台一向鋤強扶弱，只要你係「雞蛋」，勝算就會高過人！預期會有更多樂隊、甚至歌手宣佈「我要獨立、我有態度、我要做Indie」！
（5）Eason會唱錯歌詞。每年叱吒，Eason都幾乎一定會唱錯歌詞，呢個應該係傳統嚟嘅，下年相信會係一樣。
（6）女歌手金獎無誤：一定一定一定係容祖兒！
（7）認真便輸了。曾經講過，「大家就以為『香港小姐』前面加香港兩隻字，就真係代表香港」；拎「叱吒十大」，唔通隻歌真係叱吒風雲咩（如果係咁，2014年「今天我」早就應該拎獎了）。
想知一年邊十隻歌最受歡迎？每年Moov、KKBox都有年度排名，大數據比小圈子「選舉」來得更精準。呢個小圈子「選舉」以前大家鍾意睇，係因為商台識sell，sell到大家可以喺電視睇到歌手罕有嘅「真性情」。今時今日，歌手要賣「真性情」，fb、IG自己都識「造」，而且來得貼地。所以叱吒頒獎禮早已變成一個純粹情意結，仲會睇，好多時係出於咁嘅心情：「係咁意，都睇嚇啦」。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
