搶炒特朗普找數減稅
2017年04月26日
法國大選睇嚟爆唔出黑天鵝，加埋美國總統特朗普「找數」，公佈減稅到15%的方案，市場認為減稅幅度好大，帶動外圍股市造好，港股高開後亦愈升愈有。
外圍股市造好
特朗普做左總統，有人話有兩個影響，一個係益左歐洲嘅主流建制派，因為大家見選個
政治素人出嚟，原來都幾搞笑，所以法國以至德國大選，主流候選人嘅情況都穩番啲。
第二係美國在內政外交都想搞啲新猷，好似特朗普就話要派航母戰鬥群去應對北韓危機，但唔知班軍佬係整蠱定係烏龍，戰鬥群一度唔知去左邊。有美國支持者就話呢啲可能係兵不厭詐，但更多人估係六角大樓陽奉陰違囉。
憧憬養老金入市
軍事外交出左洋相，特朗普今個星期就會提交減稅建議頂一頂。一般估計，美國政壇班幕後大佬未必聽佢支笛，但講到減稅就好啱班財團聽，出事機會細啲，所以股市偷步炒上，美股前晚就升逾200點。不過，美國嘅財赤唔細，要大幅減稅錢從何來係問題，有分析估計，特朗普要寬免巨企海外盈利調回本土嘅空間大啲。
主要因為呢啲錢本來就徵唔到稅，利誘佢地調回本地嘅成本唔高，要留意嘅係美資若然調錢回國，對全球資金供應會有乜影響，如果美股再向上飊，就不妨先食啲胡。
外圍造好，內地A股連跌幾日後，雄安新區概念股集體反彈，市場情緒就稍為回穩，內地股市反覆高收，上證收市小漲5點，報3134點；深成指升73點，報10165點。
港股恒指昨日高開65點，多隻重磅股齊齊造好，午後內地人社部公佈1370億元人民幣養老金已到帳並開始入市投資，刺激本地大市進一步攀升，恒指重上24400關，並以全日高位收市，收報24455，升316點；國企指數收報10272，漲164點，成交金額769億元。股王騰訊再創新高，升2%以全日高位242.8元收市；周初急升嘅長江基建(1038) 再升2.4%，收報67.6元。
長地回購仲實際
長和系呢個星期表現頗硬淨，長地(1113) 收報55.15元，再升1.2%。長地公佈，日前再回購左372.3萬股，每股最高價54.5元，最低價54.2元，共涉資約2.03億元。長地係復活節賣樓，銷情相當唔錯，基本上已經達標，部份未賣單位會等稍後善價再沽。
今年長地賣樓數量唔少，補番去年未賣嘅數量，由於今年樓價持續9個星期創新高，賣樓價錢甚靚，長地回籠資金又多，而家地價唔平，搶地財團又多。
好似港鐵公司(066) 首個推出的西鐵錦上路站第1期昨日截收意向，勁收35份意向書，屬港鐵鐵路上蓋項目歷來第二多，就連市建局合作發展大角咀福澤街/利得街「需求主導」重建項目，都邀請28家發展商入標競投，買地咁貴又爭崩頭，咁係市場買番啲自己股份，實際都係增加股東回報嘅方法。
至於周一造好的電能(006) 則現回吐，逆市跌0.36%收報69.35元，收市後政府宣佈與中電控股(002) 及港燈電力(2638) 簽訂新一份《利潤管制計劃協議》，兩間電力公司的准許回報率由現時9.99%降至8%，2018年底及2019年初起生效，年期十五年，至2033年底為止。
官員估計電費調整需視乎電力公司資產淨值及營運成本而定，當局預計若其他因素不變，新協議下電費下調空間超過5%。
中電就估計根據新協議，來年盈利會少近20億元，收入有壓力，換來前景就明朗左。
陸羽仁
金融High Tea 舊文
來源 source: http://hdfin.stheadline.com
