財金冒險號：造假文化如何煉成
■香港原有嘅優勢，喺主權移交後正逐步敗壞。 資料圖片
共青團話，每年有14萬個港澳青年參與大陸交流活動，但仲嫌唔夠多，計劃擴大交流規模。其實要認識國情（我唔會話「洗腦」咁負面），唔使北上，喺香港都大把嘢睇：（1）堂堂二萬幾億市值嘅股王騰訊（700），
業績竟然唔喺港交所首先發佈，而喺旗下騰訊財經網「早洩」，違反上市規則。
（2）藍籌新貴瑞聲科技（2018），被沽空機構指控以沒披露的關連公司隱瞞開支、谷高盈利。（3）電訊國企聯通（762），據報其陝西分公司收入造假。短短一日，就認識到大陸同胞嘅無視規距及造假「文化」。
但香港人都唔好自以為高尚，因我哋正將下一代港人大陸化。近日成為網絡佳話嘅「3歲兒童神級填色比賽作品」，涉嫌由父母代筆。呢種「為求利益，不擇手段」嘅身教，當然不止於此。隨便舉多個例，為咗仔女報讀基督教名校時加分，唔少父母忽然信教，到收生後又忽然消失於教會。仔女睇在眼內會點諗？
友報有專欄指，中資金融公司為符合監管要求，暫時搵港人做負責人員之類人頭，過幾年就會用完即棄，搵番同聲同氣嘅大陸人做。
本來香港仍有法治、廉潔、誠信嘅優勢，雖然主權移交以來都正逐步敗壞，但爛船都有三斤釘，如果港人堅守呢幾樣美德，尚可苟延殘喘多幾年，但如果為人父母都教仔女做假，香港嘅賞味期限只會再提前，漸漸融為「粵港澳大灣區」中嘅普通城市。
笑笑生
http://fb.com/sneeringman
笑笑生
財金冒險號 - 笑笑生 舊文
來源 source: http://hk.apple.nextmedia.com
