金融High Tea 2017年5月12日
沽空瑞聲搶食胡
2017年05月12日
第二季港股夾淡倉向上突破，不過去到年內新高，就有大戶開餐，食指大動，指向累積升幅好大的科網股。
港股昨日高開，但同時就有兩單同科股有關的負面消息，一單係通達(698) 大股東配股抽水，一單係沽空機構跳出來唱談屬板塊明星股瑞聲科技(2018) 。
結果通達和瑞聲兩隻股份即時食咗瀉藥，通達收市報報2.83，跌咗0.25元或8%，略為跌穿咗配股價2.85元，瑞聲科技就跌穿紅底，收報99.4元，下插咗11.6元或10.5%，市值蒸發120億元以上。
通達股東成功套現
通達同瑞聲都屬蘋果概念股，通達本來做開手機外殼，近年開始做手機防水軟件，新業務推動盈利同估值齊齊上升，兩年間股價已經翻了兩番。
今個月公司股價升越3元水平，大股東就係高位宣佈減持近日5%，股價昨日就向下插。
通達大股東減持，外界可能會覺得係見頂訊號，但過去大股東減持都有睇錯嘅例子，最明顯當然係股王騰訊老闆馬化騰減持啦。相比之下，入咗成份股嘅瑞聲被人狙擊，沽空機構Gotham City Research發表報告，提出質疑就仲大劑。
根據沽空機構所講，瑞聲的利潤率較其客戶蘋果公司更高，而且更穩定，質疑係咪too god too be true(好得太過份)。
報告聲稱有理由相信瑞聲使用逾20間未公開的關連公司，以及不可信的會計，誇大及平穩化自2014年以來的盈利數據，仲話最少20間未公開關連供應商是由公司CEO家族成員或員工所擁有或管理。呢啲關連公司並非蘋果供應商之列，部份公司設於與瑞聲科技相同的營業地點，供應與瑞聲科技相同的產品，並以瑞聲科技名義聘用員工。佢懷疑瑞聲科技利用該等隱藏公司逃避蘋果公司的勞工要求。
沽空機構亦指責瑞聲科技違反香港上市條例及蘋果供應商規定，又指瑞聲科技股價初步會跌至40至50元水平。又話公司重演其他蘋果公司供應商的經歷，例如面對更多競爭及價格壓力，工資上漲等。佢仲預測蘋果及其他機構將在他們發出報告後，會對瑞聲科技進行獨立調查並確認有關發現，屆時瑞聲科技的盈利率會下跌，並趨向同業水平，所以瑞聲科技股價將會下跌，該機構就表明自己持有淨沽空倉位。
瑞聲被人爆大鑊，午後發出澄清公告，強烈否認報告嘅指控，仲話公司正就此事徵求法律意見，並保留對採取法律行動之權利。
股價離地唔沽就笨
對於瑞聲面對嘅處境，有中環茶友坦言唔靚仔，認為佢股價好有機會見咗頂。
茶友拆局話沽空機構嘅指控咁具體，唔排除係有深喉爆料，包括係公司內部嘅人或行家。而家件事搞大咗，蘋果等客戶好難扮睇唔到，所以點都要查吓，咁就成為困擾公司業務嘅因素。搞完一輪，若然有啲失閃，咁就固然慘情，即使無事都一身傷，咁已係最好情況。
茶友再從另類角度講多兩句，佢話之前都已經留意到公司主要股東，話希望派息可以等同招股價，佢講到咁豪，有可能係想威威水水。
另一個可能係想股價快啲升到高位，可以係市場抽水。無論係唔係咁，總之瑞聲股價跟住就係咁升，去到成30倍水平。去到呢啲位，股價已經唔係靠資產或盈利支持，而係靠信心。
呢個時候或者都有股東會學通達老闆諗吓食胡沽股，但沽空機構都係市場兀鷹，四圍獵食，見到有人谷高咗股價，咁仲唔跳出來搶胡，呢啲叫做螳螂捕蟬、黃雀在後。
瑞聲而家市值仲過千億元，而且流通股份唔少，基本上係想托都好難托，如果呢個分析無錯，就算瑞聲基本面無問題，股價都好有可能離咗地，而家俾人係空中射擊，要再起飛係咪都好有難度呢？
科網股搶胡之聲驟起，呢個板塊短期都有陰影，係呢個狀況下，港股仍能報升，恒指收報25125點，升110點；國指收報10257點，漲30點，成交816億元。如果大市要再挑戰高位，咁就要另搵火車頭至有機會啦。
陸羽仁
金融High Tea 舊文
來源 source: http://hdfin.stheadline.com
