Money Walker：恐慌指數3年低
■隨住美股近年破頂，相信已經冇乜人記得VIX指數。 資料圖片
有美股恐慌指數之稱嘅VIX，上周曾見3年低。
VIX反映標普500指數期權嘅引伸波幅，金融海嘯後市場恐慌情緒一度爆升，VIX亦隨之抽升兼成環球焦點。不過隨住美股近年
破頂再破頂，相信已經冇乜人記得呢個指數。
VIX上周曾經跌至3年低位，反映標普500指數波動性創3年來最少。特朗普政策傾向支持經濟，加上當選後其神志較預期正常，美股波動性低似乎係合理現象。但其實股市波動性低並非美國獨有現象，港股一樣有恐慌指數，叫恒指波幅指數（VHSI），該指數近日亦創逾兩年低位。另外，日版恐慌指數VNKY同德版恐慌指數V1X，近日一樣重返數年低位。
分析認為，恐慌指數低唔代表市場情緒樂觀向好，而係反映大市好淡爭持，未有一方佔上風，而背後原因不外乎係低息期持續及經濟緩慢增長。另外，期權投資者操作傾向有變及ETF抬頭，亦被指與市場波動性減低有關。
筆者認同此現象好大程度係宏觀環境所致，市場唔擔心美國加息縮表與歐央行收水，因為步伐預計極為緩慢，所以資金未有大舉離開債市並轉投股市。另一方面，環球經濟數據尚可，資金亦冇理由撤離股市，但同時數據亦未強勁至足以吸引投資者加注。此等宏觀局面下所衍生嘅好淡對峙角力，導致多地股市陷入升唔上亦跌唔落嘅尷尬局面。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
