「細奀茄」也搞上市 2017-06-09收藏文章
呢個年頭，唔知係上市地位得來太易，抑或殘軀也有價有市，甚至源於虛榮心作祟，上市公司主席銜頭光環太耀眼，連名不經傳、盤生意大極有限嘅「細奀茄」都話要搞IPO。
廿年前集資區區五六千萬元嘅「細奀茄」，上市費開支埋單計數豈會超越一
千萬，今時今日呢，動輒千三、千五、甚至近二千萬元，往往佔集資額由兩成至近半不等，真正水瓜打狗，唔見一截，是以不少新股上市後股票上油墨未乾已急不及待理直氣壯地發盈警，上市費用支出竟然被塑造為盈利倒退、甚至盈轉虧的理由；另一邊廂，市場又好像已對呢類無咁大個頭、又夾硬要帶咁大頂帽變臉大師司空見慣，新股例牌抄供求，股價每每偏離估值，及後被發現非真材實料時，損失的又係街外投資者。
一單IPO「刁」，不論「大刁」、「細刁」，絕對慳不了包括保薦人、律師、核數師、包銷商的專業團隊，真的，蚊型創業板股份的上市費用開支隨時多過一年淨利潤，若非「殼」價水漲船高，又豈會有如此吸引力，惹來前仆後繼。正所謂街外錢，大家揾，集資幾多個千萬事少，軀殼轉手又隨時係一筆動輒幾億元的大茶飯。人同此心，對錢揾錢的印公仔紙金錢遊戲自然趨之若驀。
殺人放火金腰帶，修橋補路無屍骸？又未必！
近年一批建築、裝修、工程股，修橋補路的行業，未至於會無屍骸，盈利能力有限公司而已，勝在業務簡單易明，上市之路特別平坦，是以有如雨後春筍般，上完一隻又一隻，一間兩間年年賺一千萬起、兩千萬止的工程公司，股價長期居高不下，市值夠大，將來夠秤金蟬脫殼，亦不至要被監管機構抽秤蛇吞象。
留給囝囝 - 胡孟青 舊文
來源 source: http://lifestyle.etnet.com.hk
