金融High Tea 2017年6月2日
短炒地王效應
2017年06月02日
最近地王頻頻誕生，繼恒基(012) 投得中環美利道地皮後，南豐周三又宣佈奪得九龍灣嘅商貿綜合地皮，港資連環高價奪地，搞到大家身家厚左，資金炒落後，開始炒到本地地產股，恒基買貴地嘅陰影減退，股價仲飆番上去今年高位，收市報51.45元，跑贏大市升左2.2%。
另一龍頭股新地(016) 就升2%，收117.7元。投左平地嘅利福國際(1212) 收報10.84元，升左4.2%，佢賣左嘅利福地產(2183) 發狂咁炒高，大升27%，收報6.6元。
港資近排頻頻奪地，除左恒基同南豐買左地王，如果有留意，新世界(017) 都用左成百億元連續買左兩幅長沙灣工貿地，另外信和、嘉華嘅財團又以80幾億元投到港鐵粉嶺嘅地皮，似乎港資呢排仲勇過內資。
揀股要諗埋大股東作風
對於港資投地，陸羽仁同有份中左一條標嘅發展商老闆傾偈，問佢係咪中央真係有出手，叫內資讓吓路呢？高層就笑言，阿爺有無出聲叫讓路就唔知，但佢聽到早兩年本地發展商唔投地，內地就鼓勵佢地落嚟香港買地起樓，當時做法係准許佢地用內地資產擔保，用嚟係外面借錢買地，即係所謂「內保外貸」。
內房最識睇政策做生意，見阿爺咁鼓勵，醒目者自然就唔怕做多瓣，殺埋落嚟香港搞地產。但後來愈做愈高興，又倒過來變成高價投地，搶晒香港嘅地，搞到連龍頭地產商都頂唔順，話內資癲價投地。呢個發展商老闆話，可能因為見港商反應咁大，所以據佢所知，阿爺呢排都好似叫停內企用內地資產擔保投資香港地產嘅做法，加埋金管局收緊地產項目融資，自然令內企停手，而港資投地嘅優勢返番嚟。
雖然無左內資，但港資可能係餓地太耐，出手一啲都唔手軟，李四叔買中環黃金地固然勇，無投地好耐嘅南豐買九龍灣地，呎價都高過大半年前崇光係隔離投嘅地皮一倍。可能因為投地嘅價高唔係單一事件，令到市場相信左手頭有貴重物業嘅地產公司，資產真係厚左，所以昨日就有啲資金流入去炒吓本港地產股，仲慢慢推高埋指數。
本地地產股大件夾抵食，呢樣嘢其實唔使等地王出世都已經存在，但地產股股價表現，仲要睇埋大股東係咪做嘢反映股價，最現實係好似華人置業(127) 不斷賣產派息，其他好似李四叔年年十送一紅股，都對股價有利，總之大股東肯益吓小股東，股價跑贏大市機會就好高，呢個亦係呢排揀地產股嘅重要準則。
中資金融股向好
地產股向好，恒指高開75點後，一度因為內地股市腳軟低見25614，跌46點。之後重磅股騰訊(700) 轉跌為升，帶動港股回勇，恒指收報25809，升148點；國企指數收報10619，漲16點，成交846億元。帶動大市嘅騰訊(700) 升1.35%，收報271.2元。中資金融股向好，工行(1398) 收升1.73%，收報5.3元；建行(939) 漲1.4%，收報6.53元；中國平安(2318) 升1%，收報50.45元。
周初急升嘅恒大(3333) 繼續企硬係高位，收報14.32元，上漲2.43%。恒大繼續有動作出台，發通告指其屬下的恒大地產已與投資者簽定第二輪投資協定，引入395億人民幣的資本金。連同第一輪引入的戰略投資，共計成功引入資本金700億人民幣，該資本金換取恒大地產擴大後股權的26.12%。反映恒大地產回歸A股嘅安排逐步落實。
陸羽仁
金融High Tea 舊文
來源 source: http://hdfin.stheadline.com
