智取大市：高位死坐如賭博
■投資者如果噚日有減磅，唔使急住買返。 資料圖片
上期提到，要睇實恒指小時圖，出現三連陰或大陰燭就要再減。話口未完噚日小時圖隨即大陰燭，揸重貨嘅投資者嗱嗱臨掟貨減磅。
跌市前，恒指9周RSI處於80以上嘅超買區，9個月RSI接近80水平，超買到同2015年港
股大時代嘅頂部有得揮，記住係頂部！同7月初騰訊（700）《王者榮耀》觸發大跌市相比，技術上更超買，而家風險回報明顯不及一個月前吸引，絕不能好似7月初大跌一役般老定死坐。
股市要跌至一個吸引水平（累積跌幅大或估值低），先能夠畀一直等入市等到頸長嘅投資者一個狗衝機會，而被震走嘅投資者亦同時反手買，觸發更大量資金湧入股市，情況可能係大家形容嘅牛三。不過，一日半日跌市，遠未吸引到成手Cash嘅投資者撈底，而持貨者則面對風險突然升溫，所講嘅風險係市場情緒有可能由亢奮變成恐慌，如果跌多一日，情緒急轉直下，高基數之下，股市有機會拾級而下。再講，股市劇本往往出人意表，係咪仲有所謂牛三都成疑問。
如果噚日有減磅，唔使急住買返，但重倉而未減磅，就等如同市場情緒嚟一場賭博，相當冒險。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
