金融股輪流炒
2017年08月02日
金融類股份呢期輪流發力，銀行股升完，昨日輪到內險股接力攻堅，令恒指再創兩年新高後，國企指數扭轉落後形勢。
港股呢排升個唔停，但唔係雞犬皆升O個隻，指數雖然再創兩年高位，但都有唔少股份創左一年低位，主要係入市資金唔係大水漫灌式湧入，交投始終喺一千
億元樓下，昨日先再過千億，成交1038億。喺水仍然唔係咁多情況下，好多三、四線股都無乜炒味。
國企指數昨日發力，呢個同內地股市呢排氣氛改善有關。滬指昨日高開後反覆上行，以3292點紅盤收市再創短期新高，成交2564億元人民幣，呢個係連續第5日升市。深證成指收報10525點，升20點，成交額2856億元。內地早前表示，下半年銀根唔需要再收緊，呢樣係應對經濟下半年有放緩嘅跡象，同時美元匯價呢排跌得多，加息步伐無先前預期咁快，都為內地提供左財金政策上嘅唞氣位。
內險大環境有改善
o依家恒指升破兩萬七，距離2015年大時代只差一千點左右，但比對上證指數兩年前造出嘅5166點，上證如今仲低左1874點，好多國企股喺內地都有上市，內地股市未係咁得，所以都拖低左香港嘅國企指數，比較其他港股就變成落後，下跌風險細啲。內險股主要係投資內地，過去有段時間市場成日驚內地爆煲，令佢地嘅資產風險折讓好高，大陸依家話停止收緊銀根，從壞嘅角度睇係經濟有下行風險，從好嘅角度講收水威脅停左，呢樣對大企影響至為明顯，所以下半年開始，見到內險股開始由低位慢慢築底回升。
平保(2318) 、國壽(2628) 及建行(939) 為升市火車頭，三股合共推升恒指84點。內險股當炒，市場畀嘅理由係中保監計劃評估各內險表現後實行差異化監管，市場憧憬大型險資將受惠，消息刺激平保一度高見60.4元，創26個月新高，收報60.3元，升4%，成表現最佳藍籌股；國壽升3.6%，報25.65元。內銀股都獲北水追捧，建行升1%，報6.57元；工行(1398) 升1.3%，報5.54元；中行(3988) 升1.8%，報3.92元。喺多隻重磅中資金融股帶動下攀升，一度高見27558，創26個月高位，升幅達234點，尾市升幅稍收窄，恒指收報27540，升216點；國企指數收報11024，上漲196點，成交金額1033億元。成交過千億元，都益左港交所(388) 升2.2%，報227.6元；其他靚仔藍籌有長實地產(1113) 升2.2%，報64.65元；中銀香港(2388) 更升3.5%，報39.8元。
渣打又偷步炒業績
無論內險同其他金融股，都係受緊同一個周期影響，就係美國對貨幣同銀行監管調整，令到受壓多年嘅金融類別股價進入較友善經營環境，所以醒目資金就專等消息炒呢類股票。今日渣打(2888) 公佈業績，周二偷步再升2.6%，報88.25元。業績優於預期的滙控(005) 周二曾見79.15元，收市升0.51%，報78.85元。
渣打同滙控唔同，就係大笨象資本好足，有大把本錢派高息兼回購，渣打手緊好多，但隨著美歐市場改善同商品價格大幅反彈，渣打客戶狀況好返好多，情況如果持續，回復派息係遲早嘅事，成為炒作理由之一。
陸羽仁
金融High Tea 舊文
來源 source: http://hdfin.stheadline.com
