【實力取勝】藍鼎長線要睇好（陳承龍）（第145期）
2017-10-5 16:30:30
上個周末，小弟同幾個同事去咗濟州睇藍鼎（00582.HK）個項目「濟州神話樂園」，起初都係抱「有得睇咪睇下咯」嘅心態，睇完先知原來咁堅。小弟今次都算係大鄉里出省，第一次踏足韓國，由於好多貴
賓，例如西京投資劉央都獲邀出席呢個開幕禮，啲機位爆到七彩，《港股策略王》採訪隊要喺上海浦東轉機先去到。
正路採訪，就係番畀「摸頂陳」陳栢運等其他同事，今期小弟就分享一下呢個trip觀察到嘅細微嘢。藍鼎投資嘅呢個濟州神話樂園，總共有三期，三期落成後過山車都有三個，你哋話個Size有幾大，第三期仲係同Lionsgate合作，會有《Hunger Game》、《Now You See Me》等主題遊戲，而樂園門口就有韓國最大娛樂公司YG Entertainment負責、Big Bang隊長G Dragon（權志龍）設計嘅YG Town，搞下特色店舖同有啲表演場地。
今次開幕嘅第一期，主題係一套叫《Lauva》嘅韓國大熱卡通，主角係兩條蟲，紅色嗰條叫Red，黃色嗰條叫Yellow，個名雖然勁hea同唔知佢套卡通講乜，但開幕嗰日見啲小朋友見到Red同Yellow時發曬癲，情況就好似幾年前香港小朋友見到火車Thomas或者近年嘅Peppa Pig一樣。所以濟州神話樂園其實淨做當地人生意，已經唔使愁。
上期策略王雜誌講到，藍鼎有機會係銀娛2.0，著墨喺佢個賭場，但藍鼎個項目重點係整個度假區，反而有啲似迪士尼2.0。小弟喺濟州做facebook live間clubhouse，原來可租可買㗎，換句話講，藍鼎呢個項目，係集地產+旅遊+賭場概念，好似一舖牌咁叫幾飛，贏面好高。雖然，去完呢個trip返嚟嘅第一個交易日，藍鼎插咗14%，但呢間嘢200億市值左右，投資咗20億美元落呢個濟州項目，點睇都係堅做，唔會咁快玩完卦？
藍鼎項目嘅賭場，頂計12月初開幕，到時策略王都會派員出席，同時Four Seasons、萬豪等大型跨國酒店都會相繼落成，呢個國際級嘅旅遊渡假項目，喺東亞區都係一個矚目項目。但講到最吸引小弟嘅，當然係賭，所以亦都抽空去咗濟州其他賭場參觀，最後揀咗當地司機話「相對較大」嘅新羅酒店（Shilla）。成間酒店好優雅，一啲賭味都冇，一入到賭場，竟然一個客都冇，全層得3000呎左右，中間有兩個張任達華做代言嘅海報，嘩，邊有氣氛㗎？一場去到，當然有賭番幾手啦，個場賭21點同百家樂最低注係1萬韓圜，即係約70蚊港紙左右，注碼細到呢，其實賭到有啲眼瞓。濟州現有嘅賭場，太冇娛樂、賭博氣氛，試問又點可以吸引到好賭嘅中國客呢？因為「限韓令」，去韓國旅行嘅陸客係少咗，但濟州島接待遊客總人數就不減反增，大家話點解呢？咪因為賭咯。呢程小弟有睇過正在裝修嘅藍鼎國際級賭場，一睇就知係走澳門路線嗰隻，由中國人搞嘅賭場，相信一定好玩，應該會一改濟州賭場沉悶嘅風格。
藍鼎長線小弟當然睇好，但短期波幅可能會大啲，如果大家有機會去濟州神話樂園玩，就會知呢個項目有幾實在。係喎，如果搞旅行團一齊去玩，會唔會有人有興趣去？
實力取勝 - 陳承龍 舊文
來源 source: http://www.winmoney.hk
