Money Walker：當買樓變集體智慧
■儘管買新樓放租實際回報唔太吸引，但新盤依然不乏買家。 資料圖片
樓價升到令人麻木，供不應求、息口低企、北水掃高，呢堆原因已經欠新意，摩通近排提出咗一個未來可能推動樓價向上嘅新理由，大家不妨睇嚇中唔中。
摩通報告指，自2009
年以來，合共有1.1萬億元資金流入本港，而政府期內累積約5,000億元財政盈餘。該行相信，呢個係本港資產價格期內累計勁升兩倍，但通脹只錄28%升幅嘅原因。重點係新一屆政府屬意加大公共開支，如果有關做法成功刺激本港通脹加快，摩通認為扣除通脹後嘅實際息率，將會因通脹上升而受壓。而實質息口低企，或會蘊釀新一輪資產價格升浪，當中當然包括樓價。
倘摩通上述推論屬實，左右本港息口嘅主要因素，已經由美國加息步伐快慢，變為政府開支能否有效推升通脹。不過綜觀環球通脹谷極唔起，除非香港政府未來幾年再有更多派糖政策，否則單靠下調中小企利得稅、請市民坐巴士地鐵，對通脹刺激怕且有限。
姑勿論通脹上升繼而推動樓價進一步走高嘅風險有幾大，可以肯定嘅係，就算買新樓放租實際回報唔太吸引，新盤依然不乏買家，因為買樓保值已經係港人根深蒂固嘅觀念。好似日前有買家參觀示範單位時就向傳媒爆出金句，話多人買樓係集體智慧。
當買樓已成香港人一生必做事情之一，係傳統集體智慧，甚至與結婚生子同人生成就掛鈎，又有幾多買家置業時，會考慮扣除通脹後本港實際利率、供樓租樓開支比例、租金回報率等先至去馬？此等硬數據，大概只係傳媒同大行理性分析樓市嘅素材，亦都僅此而已。
El.
http://fb.com/moneywalkerhk
本欄逢周三刊出
El.,樓價,息口,通脹,集體智慧,
El.
Money Walker - El. 舊文
來源 source: http://hk.finance.appledaily.com
