港交所舊消息新概念
2017年12月19日
港股喺29000點穿梭，一日落，一日上，昨日彈升逾200點，重上29000呢個心理關口，今次輪到老牌概念股港交所(388) ，股價爆上4.2%，收報236元，貢獻恒指36點，真係好耐未見過佢咁叻。
港交所爆升，主要係發表「同股不同權」報告，基本上呢個做法已經係勢在
必行，市場都傳咗好耐，依家方案拎出來，個市要炒上，咁就選中港交所嚟炒。
中環茶友話，港交所同股不同權改革，早排已經傳出綠燈，若然睇好呢個消息，基本上唔使等方案出台已經可以買，但佢一直無乜反應，唔見開車，直到昨日大家先好似瞓醒咁，話馬雲的螞蟻金服等科技大企可以來港上市，港股成交可以上升咁話。
睇preprofit吸生科股
茶友講的情況，其實係股票市場常見的世情，好多股票潮流興起上嚟，貴貴都有人追，有啲股票明明睇落可以買，但大家就無乜興趣，好以港交所早幾年係內地大媽至愛，大家成日炒北水南調，呢兩年滬港通、深港通相繼搞掂，美夢成真，大家反而覺得無乜特別，充份反映乜叫幻想美麗、現實殘酷。
睇番港股呢輪日日成交過千億元，以往係大升市先至有呢個交投量，說明北水南調真係已經發生緊，呢樣嘢對港交所盈利有實在好處，只不過大家覺得概念已經交咗功課，股價唔跌已經好彩，o依家港交所拋出同股不同權，佢先借勢郁郁。
香港之前因為拒絕同股不同權，令阿里巴巴走咗去美國，令港交所少咗個大客，o依家拋出呢個方案，財政司司長陳茂波同前任鬍鬚曾好唔同，波叔積極表態兼支持，於是大家憧憬放鬆咗限制，會多咗科網股嚟香港。
陸羽仁同政經猛人講起，佢話同股不同權主要係吸引螞蟻金服嚟掛牌同阿里巴巴回流，但之後作用可能無想像中咁大，皆因後來科網股好多老闆都已發咗，唔再需要用同股不同權去融資，所以呢個政策會過時，反而要睇重係未有盈利前上市的放寬(preprofit)，因為好多生物製藥公司都有呢個需要，若然做到可以吸引一啲有潛質的生物製藥公司上市，佢哋嘅潛質都唔小。
港交所借住放鬆上市規定，係咪可以概念重生未知；不過，今年大市交投多咗，佢嘅盈利喺2017年會好過2016年後大時代表現，現價接近50倍市盈率，數字偏高，優點係數字上會有增長。
佢股價呢排硬淨番，唔排除係基金提早換入啲有增長的金融股，令佢股價走勢強番，如果係咁，估計佢股價向好中，但唔會升得太急，可以等佢小回時吸納，作為來年下注對象之一。
港交所造好，港股最多曾升295點，高見29143點，收報29050點，升202點。不過，成交額回落至不足1000億元，是近一個半月以來最少。
舜宇光學紅底失守
借住炒港交所，本地券商股都有炒作，英皇證券(717) 升3.6%，收報0.58元；耀才證券(1428) 升1.3%，收報2.39元。個股中發盈喜兼獲大市上調目標價的玖紙(2689) 有追捧，升5.8%，報13.04元，該股料中期純利按年增長不少於90%。
升市中手機設備股繼續成為沽貨換馬對象，紛紛逆市下挫，舜宇(2382) 自染藍後，股價持續受壓，昨日跌穿「紅底」100元關口，最低曾見94.4元，收市跌2.1%，報99.85元，見約四個月低位。瑞聲科技(2018) 跌1.7%，收報137.1元，丘鈦(1478) 重挫近9%，收報10.26元；高偉電子(1415) 跌3%，收報2.62元；比亞迪電子(285) 跌3.8%，收報15.2元。
陸羽仁
金融High Tea 舊文
來源 source: http://hdfin.stheadline.com
