Money Walker：比特幣打不死之謎
■有朝一日，當全球各國聯手要求比特幣平台提升持有人身份透明度，相信係比特幣步向末日之時。 資料圖片
即使長期被形容為資產泡沫兼龐氏騙局，比特幣價格今年仍錄十幾倍升幅，投資需求更由小眾步向大眾。
除咗唔可以好似普通銀紙咁，
一張張袋落銀包拎出街買嘢，比特幣同傳統貨幣嘅最大分別，其實係在於冇央行背書。冇央行認數，意味比特幣價值可以隨時跌到零，衰過以前出名垃圾嘅津巴布韋幣。
但呢點卻無阻市場為呢隻虛擬貨幣瘋狂，因為比特幣擁有另一個一般貨幣永遠無法媲美嘅特性，就係具有一定匿名性，較難追蹤到持有人背後身份。雖然現金一樣具匿名性，但講到涉及跨國範圍，梗係用虛擬貨幣最方便。基於上述原因，比特幣亦成為地下經濟參與者、走資者、騙徒與黑客嘅付款及收款工具。
貨幣有其定義，必須符合幾大條件先可以稱得上為貨幣，分別係可以作為交易媒介、記賬單位、儲存價值嘅工具，以及被視作延期支付嘅標準。虛擬貨幣雖未完全、但某程度上符合上述幾大功能，故即使受多國政府打壓，兼不斷被環球財金界名人睇衰，鑑於其唔見得光嘅特性支持，比特幣㩒極唔死之餘反而越來越多人識。
不過，當比特幣喺主要交易所推出期貨產品，難免令人擔心呢隻虛擬貨幣進一步走入主流後，會否惹來各地監管機構更大關注。事實上，本港證監會喺芝加哥期權交易所推出比特幣期貨後，已提醒投資者要小心比特幣風險。倘若有朝一日，全球聯手要求比特幣平台提升持有人身份透明度，相信亦係比特幣步向末日之時。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
