智取大市 - 晉佳 2018年1月19日
智取大市：新手的正確態度
■證券行近排上客突然大增，呢個係升市亢奮嘅最好證明。資料圖片
港股繼續攀頂，繼藍籌後，地板細價股禾雀亂飛，但炒作主題往往即日先知，二三線股走勢梅花間竹，操作亦不易，睇嚟藍籌仍然係短線理想持貨選擇，但繼續以先前諗好嘅劇本作為食糊策略，就係港股加速衝高就趁高位減持。
𠵱家似乎唔係推介藍籌、二三線嘅時候，要買就一早買，𠵱家係等食糊。如果閣下年初至今一直輕倉甚至冇貨？就更加冇必要再介紹股票叫你高位接貨了。
證券行近排上客突然大增，呢個係升市亢奮嘅最好證明，因為平時唔買股票嘅人，突然對股市有興趣，去到創新高先急不及待去開戶。連平時唔買股嘅人都引咗出嚟，仲有乜人未買股票呢？呢啲就係耗盡購買力、港股中短線將近見頂嘅徵兆之一。
散戶去到升市㷫烚烚之際先去開戶，首先證明對股票唔夠熱情，對入市嘅準備嚴重不足。正確初級投資者嘅態度，係有資金能夠投入股市時，就即刻做功課及衝去開戶，然後等待合適嘅市況及個股機會就入市。如果一早有資金，但去到近排羊群心理驅使下，先去開戶，又或者懶懶閒拖得就拖，拖到而家先搞，相信暫時股票仲未適合你去投資，不如調整好心態先學買股，否則都係白交學費。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
