昨日癲價 今日筍價
2018年02月14日
歲晚趕收爐，對好多人來說，呢兩日差唔多無乜興趣做嘢，甚至炒股意欲減少，但對做「大刁」者而言，幾時都要把握機會。好似恒地(012) 就喺雞年尾都做單「大刁」，用159.59億元買咗海航喺啟德兩幅地。當日海航接連買入四幅地皮，被本地龍頭發展
商形容係「癲價」，但現時數口出名精的四叔李兆基，二話不說照成本價加17億入貨，證明當日嘅癲價，已經變成今日市價，甚至係筍價。
恒基今次喺向海航在港上市的香港國際建投(687) 買入呢塊地皮，兩幅地是在2016年尾買入，是次作價較香港國際建投買入時作價多約17億元，當時呎價曾創區內新高。今次交易海航賺得唔多，不過就證明佢手頭仲揸住的兩塊地價值，算係除笨有精。萊坊高級董事及估價及諮詢主管林浩文評論呢單交易，形容係正常商業交易，亦反映買家對後市及啟德前景信心。恒基買入二手官地，發展商之間作地皮交易，屬另一種增加土地儲備方法。
今次四叔大手入市，有中環茶友講，佢之前坐車經過啟德，離遠睇覺得環境好擠迫，感覺麻麻，但最近佢入過去，近觀見到沙中線啟德站已經成形，將來由呢度過海好方便，加上成個區係新建成，比原先想像好好多。當年海航投呢幾塊地皮，呎價去到13000元，遠超之前紀錄，令到市場嘩然。不過，近呢兩年地價狂飆，已經追上甚至超過啟德地價，只係市場對海航買貴地印象好難抹走，今次四叔肯加價買，證明咗呢個已經係市場接受價格。
海航堅持要有錢賺
今次海航放盤，好明顯係想紓緩財政壓力。據聞呢次佢同唔止一間大發展商傾，條件係點都要賺啲。有財團想壓價，傾緊期間突然爆出恒基買咗，估計係恒基條件爽啲，海航最後就成交，咁樣證明咗自己手頭兩塊地的價值，可以話係一家便宜兩家着。香港國際建投副主席劉軍春喺交易公佈後話，出售上述兩幅啟德地後，除可提前獲得資金回籠及理想回報外，亦能集中資源發展餘下兩幅啟德住宅用地。從呢個角度分析，海航手緊要賣嘢，價錢梗係唔企得咁硬，有人覺得四叔都係執到筍嘢O添。消息公佈，香港國建股價彈咗7%，收2.66元。
四叔呢次用昔日癲價買地，咁佢都肯制，有人奇怪，乜恒基唔係有好多農地可以補地價咩，點解仲要搶貴地。諗真啲，發展商手頭農地可以補地價，等如係平價揸住期權，日後加錢就可以換股，如果無地就話用農地換來起樓啫，若然街外有地，咁點解唔留番啲期權先？所以雖然近排佢補咗幾幅大地，相信日後佢又會開慢車去用農地補地價，所以政府如果自己唔主動買地，想發展商補地價去增加供應，恐怕都係諗得太過美好啦。
長假臨近買家唔高追
美股向好，加上內地股市反彈，港股昨日裂口高開390點，恒指一度重上三萬大關，半場最多升709點，高見30169，午市跌幅收窄，收報29817，升379點；國企指數收報12004，漲104點。大股騰訊(700) 漲3%，報422.4元；平保(2318) 升3.65%，收報82.35元；盈喜股舜宇光學(2382) 急升後略回，收升5.7%，收報119元。珠江鋼管(1938) 出售可以改建住宅的廠地，急升36%，收報1.03元。
由於長假漸近，買家唔想大力高追，都係正常反應。內房呢排反彈唔錯，多間房企公佈2018年1月經營數據，大部份企業刷新同期歷史紀錄。其中龍頭房企業績實現開門紅，碧桂園(2007) 、萬科(2208) 、恒大(3333) 三間企業業績超過600億元人民幣。恒大收升4%，報22.1元；萬科收升1.7%，報35.25；碧桂園發盈喜，收報13.14元，升0.2%。
陸羽仁
金融High Tea 舊文
來源 source: http://hdfin.stheadline.com
