【板塊關鍵點】勿撈中興 大市議息後行新方向（康思源）
2018-6-14 9:27:56
恒指在上周五出現大陰燭後，周三又出了枝大陰燭，沿用之前的模式，恒指有機會下試30500點，如果都失守，就有機會再考驗31000點支持。思源周三在開市初段選擇了做恒指即月30000點Lon
g put。騰訊(00700.HK)及平保(02318.HK)跌幅十分溫和，從跌市可真正試到個股的支持有多大，暫時睇係較之前好，可是港股正面臨缺水，所以再次在阻力前腳軟。
A股反彈完後再跌，萬一再探底恐怕對港股很不利。從剛公佈的市場數據看，不論新增人民幣貸款或M2等都反映去槓桿持續。此外，香港同業拆息上升，亦意味香港都有資金緊張問題。在美國聯儲局議息前，港股已跌定先，倒要看看今次議息是否放鷹，因為局方有建議每次議息後都開記者會。周四大市點走？技術走勢係向淡，但議息為重大基本因素變化，隨時可扭轉形勢。因此，周三雖跌，但成交量委縮，顯示沽壓未真係算好大，相信係部份投資者在有消息前先減倉。跌勢成唔成，要聽候發落。
議息要關注的重點為日後的加息路綫，從公佈經濟預測點陣圖，可估到加息會不會加快。係加三次定四次？甚至更多？美國加息及預期會影響美滙走勢，再左右新興市場股滙債表現，所以宏觀變化要望實。另外，亦要睇緊港滙，資金有無流出，甚至小型銀行會上調最優惠利率，這對股市會屬震撼彈。
最後，中興(00763.HK)復牌，思源建議不要撈，因為除了罰款，高管要全部撤管殺傷力其實更大，試問一間大公司經歷全盤人事重組怎會是一時三刻可以復完？普通公司併購都會有戒心，因為做得唔好，人事起衝突會拖死公司，今次問題其實更嚴重。依家中興係完全判斷唔到前景，而且美國國會計劃表決反對放生中興，即是交了罰款最後都可以判死刑，未審完就諗住押注？仲有A股唔知有幾多個跌停。要尋刺激不如過大海好過，勝率起碼都有50%。
康思源
Email: hongshiyuen@gmail.com
板塊關鍵點 - 康思源 舊文
來源 source: http://www.winmoney.hk
