智取大市：汰弱留強反轉玩
■煤價持續強勢，從事煤機業務嘅三一國際舊年12月開始股價見底回升。互聯網圖片
熱炒嘅戰線越拉越闊，細價股亦有炒風，短線仍然樂觀。面對二三線股，執倉手法可能轉一轉，以往興汰弱留強，但今時今日若見到手上持倉基本因素冇不妥，長線升勢未完、短線有調整的話，反而係低吸機
會，而唔係要沽走佢。重汽（3808）急調整兩日後隨即反彈至原位，能趁調整時吸納，就已經Lead住了。換馬反而趁個股短線升幅擴大，進入超買情況然後食糊，再搵下一個開始轉強嘅對象。
從事煤機業務嘅三一國際（631），舊年12月開始股價見底回升。煤價持續強勢，終於帶動足足低沉超過5年嘅煤機行業進入補貨潮，同之前推介龍工（3339）邏輯相若，剩係補貨潮都已夠收入、盈利大反彈。
三一國際今年首季純利再反彈1.4倍，至1.72億人民幣，假如單季收入能夠保持至全年，就能夠重返2011年、2012年嘅對上一個上升周期高𥧌水平，業績反彈動力超強，股價就同高位仍有七成距離。之前發改委要求煤礦減煤價，一度令煤炭股急回，潛台詞係煤炭需求殷切，只要唔㩒住，煤價就會繼續升，睇嚟煤機需求反彈趨勢，未咁快完。股價面對港股急chok，依然硬淨，最近守住2.5元，又再衝了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
