譜騙
電影《騙徒》宣傳照
姿色比平庸更庸的港女竟然可以搾乾宅男五十萬，社會對這個故事很大反應，因為女主角很賤，她的同謀連狗公都不如。
萬二分同意，但不打算多加兩嘴。
說到口誅筆伐，比起廣大網民，我只是一個小學雞，無謂獻醜。
但說到「騙」這個課題，縱橫江湖十幾年，我反而有很多話要說。
每個
人都有騙子基因，也就是說我們都懂得怎樣去騙，就正如邊個唔識打劫，揸住支槍走入金舖，講句「打劫」，有幾難？騙和打劫一樣，不是一個智力遊戲，純碎看你的道德底線和犯案動機。那當然，你不能是個白癡。那條是最佳的逃走路線，萬一 plan A 唔得，點樣 execute plan B，呢啲你都要計劃一下。但這是夠不夠細心的考慮，不是智力問題。
嗱，講明先，我絕對唔係話我呃人好叻，自問我給每個客戶的意見和忠告都是發自內心的，但我想藉著我與客戶溝通的經驗，為大家解釋被騙者通常為什麼會被騙。
如果 sell 與被 sell 是一場角力，而假若「我成功sell 到」算係我贏，我 sell 唔到算係佢贏，點解一個年薪三四百嘅 private banker，可以「贏」到一個身家幾十億嘅酒店大亨？肯定唔係因為對方蠢，大佬，人哋幾十億身家，做啱咗幾多千千萬萬個決定，如果佢蠢，你連豬都不如。
佢「輸」，唔係因為蠢，係因為弱。這個弱不是 weak，是 vulnerable，即是脆弱，通常來自憂或愁。可能是仔女，可能是老婆，可能是政府，可能是經濟轉形。他們聰明，因為他們每件事看得通透，但反而越看得通透，就越容易看出潛在問題。說白一點，每個富豪都有杞人憂天的時候。
既然富豪會脆弱，宅男自然也會脆弱，越宅越脆弱。寂寞的人和年老的人一樣，覺得自己沒用，沒趣，沒伴，只要有人跟他們談多一點點，這個位便太容易入了。
有很多人誤會，騙人必須要裝出一副無敵的姿態，其實完全相反。如果你乜都得乜都識，咁即係月球人，點同你溝通，所以無敵死硬，肯定咩人都呃唔到。呃人最緊要係 build 到一個 connection，一個同是天涯淪落人的 connection；頻道對，戒心自然減低，自然可以談得越來越多，而一旦談得更多，對方掌握更充足資料，你便死定了。
最後要說的，就是很多低級騙子都犯的錯誤，就是貪。「騙子唔貪，騙嚟把托？」同意，騙子一定要貪，但要貪得啱 timing。一開始不能貪，甚至要蝕。目標人物想要你的時間，你便先給他時間；想要你的感情，你便先給他感情；甚至乎，想要錢，你先給他一點點又如何？
當你肯蝕畀目標人物，就算之後對方的親朋戚友說，哎呀，你小心啲葉朗呀，佢都會理直氣壯幫你講說話：「葉朗唔係咁㗎，佢都唔係計較嘅人，對我不知幾好。」
蝕畀佢，就會信咗你，而信任便是整個遊戲的關鍵。信任一旦建立，記住要慢慢呃，唔好急，一開頭攞三五千，跟住先要三五萬。但記住記住，要有節制，如果唔係，遲早衰鑊甘，就好似呢兩位「事主」咁。
貪得無厭，真正蠢。
來源 source: http://thestandnews.com
生活 - 葉朗程 舊文
