智取大市：人仔定貿戰重要
■人民銀行將外滙風險準備金率由0調高到20%，人仔即彈，蓋過中國關稅還擊的利淡消息。 資料圖片
人行將外滙風險準備金率由0調高到20%，即係令沽空成本大增，人仔即彈，唔夠一陣中國商務部即公佈還擊，擬向美國600億美金進口貨徵收關稅。先穩住人仔再出招對抗美帝，一
好一淡消息，結果港股黑期反彈兩百幾點，究竟星期一返到嚟，點先象徵有轉機。
圖表似乎非重點，反而個股單日反彈幅度更重要。依近期跌市當中，二三線股每日跌幅介乎2至4%不等，要星期一形成實質意義力量嘅反彈，呢批二三線股反彈幅度要遠超2至4%才能收貨，配合人仔繼續彈，可能仲要期望星期一收市後有好消息，連日反彈先能夠支持市場信心。
至於點解即市遏人仔沽空嘅利好會蓋過中國關稅還擊？因為美國徵收500億美金中國貨25%關稅時，美國內部已經將名單左執右執，以尋求共識，足證美國內部過關嘅難度。
喺500億美金中國貨嘅基礎上，仲要加2,000億美金貨品關稅，仲要由10%上調至25%？其實股市跌幅冇見死人冧樓，都反映市場根本唔信成件事能夠通過，下跌只礙於市場氣氛。當然，8月尾美國關稅未能達共識，到時亦唔好期待係一個動地驚天、一天都光曬嘅強烈利好消息，只會似一個大型技術反彈嘅藉口。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
