【大茶飯】熊市不需找罪魁（青冰）
歷來的熊市有好多反彈，究竟你係不斷博反彈再被套，定係趁反彈執番條爛泳褲，自己諗。更多
別誤解了標題，查實青冰一向不會為大市定牛熊，不過現在的市況的確差，有些更貼切的形容詞出不了街，唯有用熊市吧。本地較多人用250天線為牛熊分界，咁恆指上月25日已經穿咗，鬼
佬會用從高位回落20%，以33484點計，就係26787點，咁都仲未到嘅，不過相信你都會同意，這些指標的出現，已經非常滯後，只是人們不肯相信派對已完，等到報紙話出現幾個確認訊號，先至識驚。
戰友可能會賴侵侵，唔係佢忽然打貿易戰，點會打死隻牛吖，在事後辯論並無實質用處，都冇人prove到究竟邊個係罪魁，4個月前大家都不相信貿易戰真打，甚至打都應該有綠洲，青冰當日也積極尋綠洲，避開大市，以日子計，都有兩個月的蜜月期，至六月中才爆煲，咁那兩個月斬埋的柴，夠唔夠往後呢兩個月去燒，真係視乎大家的功力，青冰奉行唔理乜股，嚴守止蝕，在極差的市況下，的確係有用的。
早幾日有評論，將今次跌市同2011年歐債危機相比，將兩幅恆指走勢圖拍埋黎睇，又的確幾似，從2010年11月的高位24988點計，跌足11個月才見底位16170點，跌幅是35%，債務危機是從2010年4月開始，當時希臘國債被降為垃圾級，歐元區領袖5月已經話救，照睇個恆指，當時係冇乜反應的，但及後再傳至葡萄牙、意大利及西班牙，這四個加埋就是歐豬四國PIGS，那時全球股市先開始腳軟，至2011年8月，美國的主權評級歷史性被下調，恆指4日跌了11%，最後在10月，歐元區落實第二輪1300億歐元紓困貸款，恆指就在那個月見底。
無論是當天還是今日，青冰都仍然覺得歐豬經濟區，對港股的實質影響不大，不過事實就是恆指跌了3成，無論你覺得個理由是否合理，甚至覺得無稽，但股票就是蝕了，無論你點鬧侵侵發文，又或者笑內地弱雞，殘酷的現實就是輸錢了。年頭股市初爆時，青冰都有提醒自己及各戰友，去年贏幾多唔重要，到水退後睇下自己有冇著泳褲先再認叻吧，如果今次個市似歐債危機，都仲要挨多4個月，自己有冇泳褲，係咪真功夫，現在應該知道。
歷來的熊市有好多反彈，究竟你係不斷博反彈再被套，定係趁反彈執番條爛泳褲，自己諗，已上岸的都不用太高興，因為股價低殘總會很誘惑，但就要挨低處未算低，頂唔頂得順，真係要計清楚先好入場呀。
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
