炒反彈不忘避險
2018年08月07日
內地政府出招穩定人仔匯價，反映阿爺喺關鍵時刻會出招維穩，港股跟住美股彈高，但指數升幅其後收窄。
中美打緊交，市況唔穩定，喺呢啲環境個市唔易大升，走短線空間有限，買貨就要有長時間捱價的準備。
港股上周跌足五個交易日，投資者信心都
幾受傷害。上星期美股回勇，加上中國對美國話要調高關稅採取克制態度，令港股出現反彈。美國總統特朗普先出硬招，中國回應唔係完全硬碰硬，只係以部份反制來接招，但同時把殺傷力再大啲嘅商品，好似天然氣放落名單，不過總體回應相對理性。
另一方面，特朗普首席經濟顧問Larry Kudlow上周五就在白宮對記者說，美國與中國「最高層」仍有一些溝通。有中環大孖沙話，特朗普做慣生意，討價還價係佢慣技，而且面子不是問題，最重要係點俾佢喺政治上攞到分。佢「晒冷」晒得咁勁，可能就係想同中國傾偈，大孖沙估特朗普的強硬姿態，既係向中國施壓，同時係做畀選民睇，暫時來說，佢呢招都有啲效果。
長和中電跑贏大市
中美O依家互相「晒冷」，美國牌面贏晒，但貿易戰唔同牌局，唔會只有一個輸家，一旦翻枱就連贏家都要付出代價。美國諾貝爾經濟學獎得主Joseph Eugene Stiglitz最近就發表左一篇文章，分析兩國角力長短。佢對美國貿易赤字之源歸根於儲蓄不足，投資和消費過大，變成坐食山崩，即使大幅增加中國進口商品關稅，美國仍要從其他地方進口，只會令進口成本更高加劇通脹。
他認為若貿易戰全面展開，人仔匯率即便在沒有政府干預下也會下跌，抵銷部份美國關稅帶來的影響，同時還會提高中國商品在其他國家市場的競爭力。如果中國更積極干預並進行更有力報復，貿易戰對改變中美貿易差額作用可能更小。中美兩國能給對方帶來多大痛苦，目前還難以確定。佢仲話，一個國家如果要打仗，不管是貿易戰還是其他戰爭，首先要確保己方指揮官擁有明確目標、可行戰略和民眾支持，在這方面美國遠遠不如中國。
文章進一步分析，貿易戰若然持續，會為美國帶來雙重損失：美國國內就業將受打擊，進口商品也會漲價。屆時美元匯率將下挫，通脹率進一步上升，聯儲局很可能被迫加息，選民情緒就會有變。所以從特朗普立場，最好是趁中國願意作出讓步時，宣佈徹底「解決」中美貿易問題，雙方皆大歡喜各回各家。Joseph Eugene Stiglitz是哥倫比亞大學教授，屬於重量級經濟學者，思考比較理性和長遠。作為商人出身的特朗普，是否着眼於徹底解決問題，抑或是不斷「扭計」，可能是兩人性格和思考方式最大分別。不過他點出特朗普雖然手拿大量王牌，但策略上不能一味只硬不軟。
同學者一樣，市場覺得硬打無好處，當感覺兩國喺度摸底，情緒無咁緊張，但內地股市仍弱，A股反彈後倒跌，上證指數收報2705點，跌35點；深成指數收報8422點，急挫179點，主要係人仔彈後又軟軟地，市場O依家估緊，若然人仔下試7算，阿爺會唔會直接出手。港股表現稍勝A股，主要係騰訊(700) 反彈，重上350元以上關口，收報353元，升0.9%。另外表現較佳的都是本地藍籌，長和(001) 上周公佈業績不俗，而且手頭現金充足，喺亂世中吸引資金流入，股價上漲3.3%，收報86.85元，為表現最好藍籌股。
銀行股公佈業績，滙控第二季稅前盈利升12.8%，每股派息10美仙，收報72.65元，升0.5%；恒生(011) 半年多賺29%，每股派息1.3元，股價上揚1.6%，收報205.6元；中銀香港(2388) 昨日升1.62%，幅度輕微大過恒生，唔排除係因為業績消息未見光。中電半年多賺26%，派息0.61元，股價升至90.05元創新高，收報90元，升2.5%。從長和同中電受捧，反映市場炒反彈不忘避險的保守情緒。
永利八連跌累挫兩成
因為市場風險胃納仍然麻麻，近幾日開始擔心受經濟不明朗影響的濠賭股繼續受壓，美資永利澳門(1128) 挫2%，收報19.6元，錄得八連跌，累跌20.8%；銀娛(027) 挫1.8%，收報56.15元，錄得六連跌，累跌12.5%；金沙中國(1928) 跌0.7%，收報37.1元，都錄得四連跌。
陸羽仁
金融High Tea 舊文
來源 source: http://hdfin.stheadline.com
