高鐵開通搵股炒
2018年09月21日
今個星期香港打完大風立立亂，中美貿易戰就開硬弓對撼，好彩股市喺壞消息唔係壞得透的情況下，反而無恙。跟住下個星期，高鐵就會通車，然後迎接黃金周假期。
中環茶友話，以往有大型基建落成，又或者有大政策，投資者都會搵啲嘢炒吓。本來，今年
菜式之一係大灣區規劃，可惜撞正中美貿易戰，阿爺唔想再大鑼大鼓宣佈，好多政策都化整為零公佈，變成無乜消息，本來炒作的股份都按兵不動。
至於另一個大項目高鐵，之前因為有港鐵沙中線事件，搞到政府同港鐵一頭煙，跟住高鐵又搞出各種大小風波，連交接儀式俾人鬧兩鬧都要改名，炒高鐵概念的氣氛自然大減。呢個星期日，中港兩地政府就會開通呢個八百幾億元的大項目，項目係龍係蛇，可唔可以帶動人流來港，好快就有分曉。
港鐵涉政治未必有着數
高鐵現時喺內地發展成熟，個別高鐵線經常爆滿，茶友認為，牌面睇高鐵應該可以起到帶動水流作用，不過就可能需要一啲時間。如果高鐵真係得，咁有乜股份可以受惠呢？高鐵由港鐵(066) 營運，但港鐵係巨無霸，呢門生意對佢短期影響有限，加上政客對中港合作項目特別多意見，佢要承擔各種政治風險，所以買佢未必好着數。茶友吼緊隻中旅(308) ，早兩日喺2.5元買入第一注，若然再跌就買第二注。
茶友數口係咁計，中旅上半年盈利3.79億元，大致持平，佢業務比較平穩，當中有部份係獨市生意，包括做回鄉證業務，一年有億幾元收益，另外集團名下有不少物業，當中位於紅磡的貨倉已補地價重新發展，加上喺旺角做證件舖址近住波鞋街，好多人都話唔使用咁旺的地點營運，市場都曾傳過公司想出售，若然這些物業變現，利潤相當可觀。
中旅一年高位係3.6元，昨日收報2.58元，調整幅度比大市略多，相信同二、三線股回調幅度較大有關，息率有3.3厘，屬於不過不失。佢創新高位時正係大灣區炒得熱烘烘，可見佢都有兩地融通概念，O依家買入收3厘息，博喺高鐵通車前同十 ● 一黃金周炒上10%食胡，都可以當係上落市用來保持活動的目標。
莎莎有偷步炒跡象
另一隻茶友研究過的股份係莎莎(178) ，莎莎今年生意復甦，公司公佈上月港澳銷售增加27%。公司去年起生意反彈不俗，今年勢頭持續，今年股價一度衝向6元，低位插到去3元邊，回調幅度不少。由於高鐵對短途客更加方便，對莎莎有利，所以基本因素中旅主要係資產夠厚，但增長相信莎莎會較強勁，只係佢息率雖然有4厘，但市盈率達27倍，昨日股價升咗5%，已有啲偷步炒作跡象，計落有啲貴，所以茶友最後無郁手。
大市方面，幾過兩日反彈，恒指波動收窄，升升跌跌後收報27477點，上揚70點；國企指數收報10792點，漲50點，成交額868億元。大股變化唔多，取代騰訊(700) 進佔成交第一位嘅美圖點評(3690) 新上市，收報72.65元，較上市價升5.3%。
大行唱好本地電訊股，數碼通宣佈全年盈利倒退後，股價見壞消息回升多日，由低位8元回升，昨日收報9.98元，升4.6%，和記電訊(215) 升3.7%。報3.07元，大行O依家先嚟唱好，會唔會有少少遲呢？
陸羽仁
金融High Tea 舊文
來源 source: http://hdfin.stheadline.com
