脫歐搞散英資銀行股
2018年10月25日
杜指前晚開市急插逾500點，收市拗腰只係跌百零點，但港股反彈無力，雖然一度回升超過300點，但收市前又再跌過，銀行地產股帶動跌勢，個別大股再創今年低點。
美國利息向上，對銀行息差應有好處，但今個月銀行股表現開始轉弱，滙控(005) 由近70元反覆回軟，
噚日又插左1.3%，報收61.6元。滙控偏弱，主要係市場對佢月底公佈嘅業績有疑慮。大行估計佢盈利將會下調，第三季業績關注點是財富相關收入同匯兌，擔心佢貸款增長放緩。
文翠珊有逼宮風險
其實，大行睇淡大笨象仲有兩個原因，一個係佢經過多番回購後，未來仲有無閒資可以回購。若然無左回購支撐，喺股市轉弱下，佢股價所受壓力比其他股份大。另一個就係擔心英國脫歐對集團構成不明朗因素，有英國媒體報道， (口依)家英國首相文翠珊提出嘅方案理論上需要一段好長「實施期」。按照文翠珊上周對國會議員傳達嘅講法，過渡期最遲會喺2022年底，即本屆國會任期屆滿之前，就會結束。但媒體爆出一份官方內部文件，明顯與文翠珊嘅講法有好大出入，過渡時間更長。由於英國明年三月前要就脫歐達成協議，否則就可能喺無協議下硬脫歐，外界估計，文翠珊仍有可能面對被逼宮，引發政治風險。呢個成為滙豐股價不明朗因素之一。
英國脫歐究竟是否可達協議，目前正處敏感最後階段，通常呢類艱巨談判，往往係爭持到最後一刻，期間有隨時拉倒嘅可能，現時講法係有95%嘅內容已經完成，尚有少量條文要解決。牌面睇唔以話好樂觀，但亦都唔算太悲觀，但呢排英鎊就因此受壓，亦成為推低滙控股價的理由之一。
英國脫歐氣氛不利大笨象，但拉闊啲睇其他銀行股表現都係一般，同樣屬於英資嘅渣打(2888) 股價都受壓跌左2%，報53.3元。渣打雖然係英資公司，但在英國的業務只有幾個百分點，按理脫歐對佢無乜實際影響，從公司股價一樣受壓，只能講係大市氣氛咁弱下，無論有乜消息都會被理解為壞消息，正如周二港珠澳大橋通車，本來有利三地交通，但結果濠賭股就係呢啲日子畀人沽低，令散戶猝不及防。
嚴格來說，呢排銀行股跌得多，主要係經濟前景睇唔通，市場擔心影響貸款需求同資產質素，加上原先跌得少，現在實行補跌，所以連無特別壞消息嘅恒生(011) 日前都跌穿左200關口，到噚日彈番去198.6元，回升0.9%，但暫時仲未升番200元嘅心理關口之上。
滙控同另一隻本地金融股友邦(1299) 呢排成為拖低大市嘅孖寶，友邦尾市跌勢加劇，收市報60.7元，跌1.5%。
科技股亦都無力，多隻科技股受壓，舜宇(2382) 早段曾大插10%，收跌4.6%，報78.5元，係跌幅最大藍籌；瑞聲(2018) 創逾兩年低，見63.2元，收跌1.24%，報63.75元。半新科網股美團(3690) 尋底，見52.25元，全日跌4.2%，報52.75元；眾安(6060) 亦創新低，收跌3%，報25.85元。
本地科技股續有沽壓
喺銀行同科技股無力下，恒生指數雖然最多反彈過306點，曾高見25,653點；但午後由升轉跌，恒指收市報25,249點，跌96點；國企指數收報10,226點，微跌8點，兩日累挫903點。大市全日成交額912.3億元。滙控成為空軍頭號襲擊目標，全日沽空金額11億元，佔沽空總額7%。反而內銀股噚日表現勝一籌，建行(939) 業績符預期，收報6.22元，升0.3%；工行(1398) 升1%，報5.29元；招行(3968) 升0.8%，報30.2元；交行(3328) 升0.72%，收報5.58元。但如果大市氣氛無改變，唔知內銀升勢可以維持到幾耐。
陸羽仁
金融High Tea 舊文
來源 source: http://hdfin.stheadline.com
