智取大市 - 晉佳 2019年6月12日
【智取大市】港股送中的代價 - 晉佳
香港回歸到近幾年，特殊國際地位其實一早名存實亡。港股長遠必然出現更大嘅估值折讓。 資料圖片 適中字型 較大字型
《逃犯條例》修訂成為國際大事，牽連到《美國－香港政策法》。香港回歸到近幾年，特殊國際地位其實一早名存實亡。對香港金融市場嘅影響，第一，外資未來喺香港投資唔使咁多，只Keep住僅僅足夠服侍中國嘅程度就ok；第二，總有錢需要走，點都有海外投資者會贖回港股基金；第三，需求嘅關係，會令到新嘅港股基金數目會大減……當然仲有其他方面。
久而久之，港股長遠必然出現更大嘅估值折讓。未來投資一隻股票，要諗嘅係，港股基金未贖回嘅錢，始終要搵地方下注，就形成有少部份強勢股出現。另一樣諗嘅嘢，有冇邊個板塊環顧全世界都難以取締？例如假設有朝一日，中國5G遠遠拋離其他國家，受惠股就有其獨特性，外資依然要買。
「新興市場之父」麥樸思講到，對發展中國家內需股有興趣。雖然香港立立亂，但全球大環境係面對美國減息、中國亦可減息，遊資又多，資金出路卻唔多，於是集中買入受環球形勢影響最少而有增長嘅股份，頤海（1579）、澳優（1717）、波司登（3998）、李寧（2331）有品牌效應下，公司升級可測性高，喺反覆市況之中，一再破頂機會大，仍可候低吸納。再簡單好過保本嘅選擇當然係領展（823）、友邦（1299）。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
