大玩5G谷經濟
2019年06月04日
美股上星期下插，主要係美國債息倒掛，市場擔心貿易摩擦影響全球增長。總統特朗普同中國鬥法未有突破，又向墨西哥開刀，恒指曾跌165點，低見26735點，創1月17日以來低位，好彩係中央宣佈發5G牌的利好消息撐住，港股最後只係跌7點收場。
美國分別與中國及墨西哥出現貿易糾紛，市場預期美方與中墨貿易戰將進一步升級。大行高盛坦言，中國近日言詞愈來愈激烈，有可能推出關稅和非關稅措施。美國對餘下3000億美元中國輸美商品加徵關稅可能性為60%，高於此前預估的40%。講到美國總統特朗普上周宣佈針對墨西哥商品的關稅措施，高盛預計，美國下周一開始對墨西哥商品徵收5%關稅機率為70%，7月1日關稅升至10%的可能性超過50%。
美國左右開弓，阿爺就三箭齊發，在上周末接連出招，如期對600億美國貨加稅，再搞針對美企的「實體名單」，又出白皮書批評美國出爾反爾。中國可能也怕出招過猛反傷自身，同時接連出招托市。中國證監會主席易會滿星期日都開工，接受央視訪問，表示中美經貿摩擦對資本市場影響客觀存在，但程度可控，而內地資本市場韌性正在增強，抗風險能力正在提高。
加快出牌利板塊炒作
易會滿出口術之餘，工業和信息化部昨日宣佈將於近期發放5G商用牌照。消息刺激下，大型電訊股逆市急升，令中港兩地股市回穩。中移動(941) 大升近3%，鐵塔(788) 反彈4%，收報1.83元，京信通信(2342) 則飆10%，收報1.64元；中興通訊(763) 炒高8%；摩比發展(947) 、中通服(552) 升近6%。5G打機都快啲，騰訊(700) 亦升2.3%。
喺發牌消息公佈後，權威消息話發牌可能快到今個星期就出籠。照咁睇，阿爺可能係美國愈搞華為，我就愈谷5G，這樣不但能在聲勢上抗衡美國，同時拉動一大片電訊產業，加強經濟抗逆力。如果這是內地應對貿易戰的重點對策，相關股份可能仲有一段炒落去。
大市午後逐步回穩，恒指收報26893點，僅跌7點；國企指數收報10430點，升43點，成交金額827億元。港股跌幅收窄，但睇番內房、地產、濠賭股仲係腳軟，如果無阿爺手口齊出撐住個市，港股再跌300幾點一啲都唔奇。
除5G股外，金礦股都逆市造好，成為淡市奇葩。全球前景成疑，油價重挫，投資者泊入黃金避險，推動金價創逾兩個月高位，金礦股普遍逆市上揚。招金礦業(1818) 收報7.6元，創一個月高，升5%；中國黃金國際(2099) 升3%，報8.93元；SPDR金ETF(2840) 升1.4%，報973元。陸羽仁講過，今年投資市場必然多風雨，金礦股可以低吸，按住呢個方程式做短線買賣，今次應該又得手，雖然執得唔多，但喺亂世中已經算係不錯。
國際建投升高等食肉
另一隻逆市造好的股份係香港國際建投(687) 。公司早前由基金宣佈全面收購，收購完成後持股量超過75%。喺上月底，新大股東完成向兩名獨立第三方出售3.79億股股份，令公眾持股量恢復至25%，符合上市最低規定。股份昨日逆市升6.7%，收報3.19元。
中環茶友係國際建投股東，早前基金提出以3元收購，茶友只係部份接納收購，其餘就繼續持有，皆因基金講明會拆骨，相信拆骨價必然高過收購價。由於接受收購的小股東超過75%，基金要找人接貨。接貨人在這個情況下願意接貨，相信都係看準公司拆骨價值。國際建投早前宣佈出售啟德地皮，根據公司早前披露，今日董事會就會開股東會，宣佈派發特別息，先食第一輪肉，所以股價見一年高位，股東喺呢個市況下，認真飲得杯落。
陸羽仁
金融High Tea - 陸羽仁 舊文
來源 source: http://hdfin.stheadline.com
