新意網老總慶幸唔賣月餅
2019年09月10日
內地降準放水，港股輕微高開，但全日乏力，收報26681點，微降9點；國指亦缺乏方向，收報10417點，跌13點；市場成交金額縮減至724億元。相比之下，內地A股強勢得多，上證指數收復三千關，升0.8%；深證指數亦重越一萬大關
；兩市成交合計增至7160億元人民幣。
港鐵修復能力驚人
人行降準放水9000億元人民幣，內銀股個別發展，工行(1398) 升0.2%，收報5.19元；建行(939) 無升跌，收報6.03元；中行(3988) 無起跌，收報3.09元；招行(3968) 跌1.7%，收報37.8元。吉利(175) 入股德國飛行出租車初創企業Volocopter，股價漲5.2%，收報13.42元，成為升幅最大藍籌股。舜宇(2382) 八連漲，收揚1%，報117.5元，收市後集團透露8月份手機鏡頭出貨量1.33億件，按年增46.5%，主要是因為公司手機鏡頭市場份額上升。車載鏡頭出貨量465萬件，按年升31.5%，主因車載鏡頭領域有較好發展。手機鏡頭模組出貨量5613萬件，按年增22.3%，主要是公司市場份額上升。
現時每逢周六、日，都係商戶提心吊膽的日子，擔心衝突蔓延至該區，好似銅鑼灣今年已經多次因為社會事件癱瘓，商戶經常要做拉閘準備。周日中環港鐵站遭攻陷，跟住去到銅鑼灣，有人喺路中心縱火。中環茶友話，睇見港鐵站搞成咁，以為今日無得坐港鐵去中環飲茶，估唔到個站噚日可以重開，真係估唔到班前線員工效率咁驚人。今年港鐵(066) 咁多事故，盈利必然會受影響，但班員工咁落力，公司年底應該有所表示。港鐵新上場的主席歐陽柏權接咗個燙手山芋，但佢手下員工嘅專業精神，先係最令人佩服。
港鐵變成磨心，過去兩日不斷被人破壞，破壞完又修復，港鐵股價三連跌，昨日再降0.4%，收報46.35元，但抗跌力已經算係咁。除咗港鐵外，本地政治風波高溫未消，地產股普遍向下。新世界(017) 下滑1.2%，收報10.12元；信置(083) 下跌1%，收報11.6元；新地(016) 降0.8%，收報114.2元；領展(823) 回吐0.7%，收報88.7元；恒地(012) 跌0.7%，收報37.55元。
過檔加盟亂世避風塘
如今正值多事之秋，話咁快今個禮拜五就係中秋，估計大市氣氛仲會靜點。今年佳節氣氛淡靜，因為無內地人來港買月餅，據聞月餅銷情大受影響，要急忙度橋散貨。
新地屬下的新意網(1686) 昨日公佈，截至6月底止全年盈利8.65億元，按年升11.44%，每股盈利21.39仙，末期息派16.5仙。期內收入16.25億元，按年升19%。派成績表後新意網股價造好，收報6.18元，逆市升4.8%。
中環茶友同新意網老總湯國江有一面之緣，佢未加盟之前係本地大飲食集團一哥，負責成間公司營運，喺任內集團推出流心奶黃月餅大賣，內地人個個追捧。後來新意網老總跳槽去數碼港揸旗，湯國江被人獵頭過檔新意網，當時大家都好意外，點解佢會順風順水過檔。不過，現在睇返若然他無轉工，集團酒樓飲食生意固然大受影響，月餅生意今年更肯定跌到一仆一碌，所以當初決定，現在睇返真係英明神武。
新意網主力係做數據中心，最初係用新地名下舊工廈注入，喺2000年趁科網股熱潮分拆出來，當時有點趕潮流抽水味道。早年本地幾間華資公司分拆科網股，十之八九跌到無影，部份已經賣盤，小股東差唔多等於輸清，部份可能仲要注資贖身。新意網做的數據中心有點似收租生意，雖然投入較大，但勝在穩陣，近年再投得工業邨土地興建新項目，未來仍有可能持續增長，喺現今亂世之下變成避風塘。不過，該股自從由創業板轉主板後，少了個炒轉板憧憬，股價由過往反覆上升，變成主要炒上落，今次業績有好評，但股價升得太急，唔排除要消化一吓先。
陸羽仁
金融High Tea - 陸羽仁 舊文
來源 source: http://hdfin.stheadline.com
