智取大市 - 晉佳 2020年1月10日
【智取大市】交投決定後市癲況 - 晉佳
A股浪比浪高，似準備越升越急。 資料圖片 適中字型 較大字型
美伊危機只係驚一日咁大把？最厲害係周三一度急挫，周四市場情緒就十足大牛市一樣，波鞋股、物管股本來並非波幅超大嘅股，單日可以升約半成至一成。市場短線會一high就派貨唞一唞氣？定係乘住強勢一路爆升上去？歷史以及近期趨勢話畀大家知，唞氣機會確係大過直線爆升，有一個最簡單又最重要嘅因素去決定，就係成交。成交一縮，成個市就回吐，繼續揸住強勢股克服波幅，博大漲小回。如果成交再谷、價量齊升，氣氛會更加高漲，以噚日成交957億就已經發曬癲咁計，如果稍後成交升到日日1,200億甚至更多，就不得了，參考例子係2015年港股大時代。
睇到呢度，仍要切記10次短線升浪都未必有一次牛三式單邊升市，機率唔算好高，未宜過份憧憬。策略上做多手準備，機會係留畀做足準備嘅股民。
點解升市基因可能突變？一嚟美股之內嘅升市龍頭蘋果升勢強得嚟，升幅越嚟越大，二嚟睇返港股，交投連日活躍、喺美伊局勢之下市場竟然更趨興奮之餘，A股浪比浪高，似準備越升越急，連帶2822同2823都準備突破由舊年4月中至今形成嘅大型上升三角形。即使一浪比一浪高、有規律咁升，趨勢都似係越升越急。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
