【冰說聰明】疫情受惠股 咪睇漏眼 - 青冰
先達物流老細林進展近兩星期keep住沽圓通，最新仍持有約5.1%股權，相信沽多兩日就唔需要再申報。資料圖片
疫情第三波殺到，市民又再去超市掃貨，幾個月前因疫情而炒起的香港電視（1137）及日清（1475），近幾日都率先搶高，另一隻低調而受惠的
疫情股，近半年都冇炒過，直至上月尾發盈喜，講緊嘅係圓通速遞國際（6123）。
約半年前，疫情開始嚴重時，大家傾盡全力在全球搜羅口罩及醫療用品，其中一個受惠的行業，就是快遞公司，而圓通國際早前發的盈喜，亦特別提到此事，加上疫情令大家更多網購，公司食正條水。盈喜話純利增長約十倍，去年同期賺五百萬，換言之今次係賺逾五千萬，聽落好似唔多，但提番你，圓通國際市值只有7.4億元，假設下半年仲keep到個勢頭，市盈率只係七倍，抵到爛。
上月發盈喜後翌日，股價一度急升五成，但隨後兩星期卻輾轉回落，個裂口差不多補曬，返回起步點，點解咁差呢？龐大的沽壓，其實係來自舊老細林進展。圓通國際前身叫先達物流，3年前圓通快遞以4.06元向林生及其拍檔收購62%股權，交易完成後林生仍持有4,128萬股，約9.9%股權。青冰在此交易的通函上看到，林生向圓通承諾，在交易完成後兩年，只能出售部份而不是全部的股份，過咗兩年就OK喇，交易完成日係2017年12月1日，換言之禁售期在去年底已屆滿。
在港交所權益披露網睇到，林生今年頻頻減持，最大手是上月公司發盈喜翌日，沽出1,100萬股，佔當日成交的38%，平均價係2.21元，而在近兩星期都keep住沽，最新仍持有2,136萬股，約5.1%股權，相信沽多兩日就唔需要再申報喇。
圓通入主後，股價由18年高位7.80元跌至今年的1.23元，完全未炒過，現時業績見起色，只待舊老細清埋貨尾，消除沽壓，大升浪將一觸即發。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://s.nextmedia.com
