不斷炒賣最後淘金見沙
近日有老友話等錢用，問我有冇興趣買他手上的物業，買多少都可以，並且送上一份物業資產表作參考。一睇之後就知道大件事，不過就不動聲色，只是話俾老友聽在這個時勢，免得過都唔敢投資，唔知銀行幾時會癲起上嚟，向持貨比較多的物業投資者追收差額，有多個錢傍身，個心都會定一些，老友話明白，
我又不是第一個講。
這只是我對老友說的理由，或者可以說是托詞，真正理由是，當我睇到老友的物業資產表，發覺大多數都不是優質物業，一個商場只剩一些近廁所單位，商業大廈則全部在低層，住宅亦是低層兼後座，原因是老友喜歡炒賣物業，每一次買入一個商場，一些商業或者住宅單位，物業代理就會慫恿他拆售，結果是優質的單位可以很容易賣出，而且有不俗利潤。老友就揸住那些低層後座，近廁所單位，而且愈揸愈多，不過，帳面上就賺錢，令到老友沉醉於物業炒賣活動。其實，這種炒賣活動有一個名字叫「淘金見沙」，不少物業投資者就是這樣被淘汰，要避免被淘汰，物業投資者應該趁樓市最好時間，一般市民恐慌性買樓時，就要出售手上的劣質物業，即使售價比市價低亦要接受，否則，到了樓市淡靜，那些非優質單位想賣也賣不出去。
成功物業投資者當買入一批單位時，會將當中三至五成單位以成本價出售，如果能夠做到的話，差不多可以說穩操勝券。就算樓價下跌，手上的單位都是比較優質，不但比較容易出售，而且出租率亦會比已賣走的單位好得多，唔使講大家都知道這叫做淘沙見金，不過還有一個條件，就是手上的優質單位不要輕易出售，除非價錢真的是很高，因為物業始終要長揸才可以有可觀利潤，短線炒賣，利潤始終受到限制，一不小心，更加會變成淘金見沙。
作者為紀惠集團行政總裁
文章轉載自「AM地產」facebook:
http://bit.ly/2wls4EF
湯文亮專欄 舊文
來源 source: http://www.am730.com.hk
