金融High Tea - 陸羽仁 2020年9月24日
金融High Tea——滙控血肉長城猶如迷魂陣
香港人對滙控（005）的情意結的確很特別，甚至可以用迷信去形容。近日大笨象股價跌跌不休，很多小股東叫苦連天，但同時卻引起很多未上船、有閒錢的普通人，心思思想上船，由此可見這間源於上海、壯大於香港的銀行，在港人心目中遺留的身影是如何巨大。
低撈滙控的魔力，可以從種種小事看到，好似這兩日大笨象跌破「海嘯價」，藝人林盛斌（阿Bob）來個「靚抽」，喺小船上影張相放上網，話自己40元入了1200股滙控，暗示自己「坐艇」，即時在網上瘋傳，好多哭緊股喪的散戶大感療瘉。
散戶情不自禁「舂」落去
阿Bob一心低撈滙控，但話咁快就損失30%本金，雖然教訓在前，昨日陸羽仁去食飯，大老闆走來問，想買點滙控長揸好唔好？聽到這個問題，陸羽仁都有點傷感，不明為何見到隻船咁多年愈行愈慢，仲好似沉沉哋，仲有這麼多人想上船，只能講滙控多年來威名實在太盛，大家行出街又日日都見到梗有一間（櫃員機）在左近，心諗不如趁抵買番多少。
被人問滙控前景，陸羽仁覺得最難答係高位已經上了車，好不好止蝕。有長輩真係140元買咗滙控，情況等如坐船出了大西洋，跳船是大海茫茫，不跳船又不知何日見家鄉，真係點答都恩義兩難全。至於無貨在手問好不好上船低撈，你估我會點答呢？有人笑言，滙控一跌就吸引散戶入市護價，就好似有魔力的迷魂陣，總係令港人情不自禁「舂」落去。
正如過去好幾次講過，滙控係新傷舊患一齊發，既受大氣候影響，又受本身因素衝擊。放眼全球銀行股，歐洲、英國、日本無間有表現，這是受制兩大因素，一是全球狂放水，令息差收窄；二是監管要求不斷加重，令經營困難。所以就算係美資銀行，除了摩根大通表現稍好，甚他好多都跑輸大市，故此股神巴菲特都大手減持銀行股。
展望前景，銀行還要面對網上金融挑戰，滙控早前免收不少手續費，相信正係應對虛擬銀行挑戰。滙控喺金融海嘯時曾經以28元供股，這個價錢會成為一個心理關口，當年滙控供股比例不低，定出28元價格供股，但除淨前股價仍在3、40元以上，確保除淨後點都會有人供股，令集資能夠順利完成。但時移世易，28元的滙控是否仲係大件夾抵食，好多分析家都話有疑問。
現時滙控市值有5800億元，如果將來正常小小時賺290億元，市盈率就20倍，若然賺580億元，市盈率就10倍。過去五年，賺得最多係2018年度，獲利980億元，其次係2015年，都超過900億元，五年累積賺了3300億元。如果未來10年，滙控能夠維持過去五年表現，咁就賺番成間公司市值，關鍵係未來滙控能否回復這幾年賺錢能力呢？簡單結論是現在買盈富（2800）穩陣過滙控。未來要見到滙控出現有利業績的重大因素，公司有機轉勢才好下注。
滙控現在面臨的難題，不少是銀行業的共同困境，東亞銀行就公佈，經過研究後決定出售保險業務，東亞（023）股價應聲彈高1.4%，報15.88元。東亞早前曾炒過賣產，但真正有刺激係出售成個銀行業務，如果只係賣壽險業務，估計套現金額只有3、40億元。
樂享倒灶孖展客無癮
有壽險大佬透露，今年以來因為全球投資環境惡化，壽險公司估值都下跌，香港市場有兩、三間公司潛在放盤，現在其實不是賣盤最佳時機，估計東亞都係因為有股東不斷催逼管理層套現，所以先賣一件貨頂住先。若然個市好，消息都可以炒一陣，但大市氣氛麻麻，咁就差不多已經消化完。
滙控昨日一度跌穿28元，之後散戶築起血肉長城，加上美股期貨造好，大市回升，恒指收升25點，報23742點；國指收報9558點，跌18點，成交金額985億元。滙控喺散戶眾志成城護盤下，收市終微漲0.17%，收報28.75元。花旗指，最壞情況下滙控可能要出售內地投資，包括放棄手上交銀（3328）股權，拖累交行股價全日插2.6%，收報3.72元，成為跌幅最大藍籌股。
其他大股最矚目係美團點評（3690）急升3%，收報250元。內地自媒體營銷服務提供商樂享互動（6988）在主板掛牌，股價收報2.7元，較上市價2.88元跌6.3%，高低位曾見2.96元及2.7元，成交5.15億股，不計手續費及傭金，一手1000股帳面蝕180元。該股超購1600倍搞到破底，孖展客大感無癮，說明投資市場幾熱的馬都有機會倒灶。
陸羽仁
金融High Tea - 陸羽仁 舊文
來源 source: http://hd.stheadline.com
