操盤手札記 - 割柑人 2020年12月21日
操盤手劄記｜「煤超瘋」有乜啟示 （割柑人）
12月7日，中國公布11月外貿總值、出口值同創新高。惟12月8日起，浙江、湖南、江西、陝西相繼頒布限電令，本周一淩晨，廣東又突然大停電；山東、山西、河北、河南則相繼頒布限產令。出口廠商捱疫情捱到出口好轉，點知年尾趕貨，限電被逼停工，賺錢不成反賠錢。
點解限電？因為電煤供應緊絀。點解緊絀？除咗因為寒冬、減排，仲因為中澳交惡！中國嘅主要煤炭入口國係澳洲，但11月6日起暫停澳洲煤炭清關，造成供應缺口。中國7月曾指澳洲「搬起石頭砸自己腳」，上周五「戰狼」外長王毅卻放軟指「中澳都是亞太大家庭一員」。中國出口廠商面對嘅困境，何止電荒，仲有航運成本飆升、人民幣滙率升值。
煤炭入口減少，已令煤價瘋漲；疫情影響全球航運能力，亦令運費瘋漲；此外，6月迄今，人民幣兌美元升值9%，更令利潤蒸發。出口股宜暫避，煤炭股則短炒無妨，長揸無謂，畢竟煤炭不符國策。國策係點？上周舉行嘅中央經濟工作會議提出八大任務，第八項係「做好碳達峰、碳中和工作」，要加快調整能源結構，大力發展新能源。
現時電力供不應求，本來火電股有運行，但因燃煤發電，動力煤價格按月升兩成，「煤超瘋」蠶食利潤，而且唔係新能源，實難受惠。新能源股則可進一步睇好，例如風電股、光伏股。花旗發表報告，預期2030年中國風電、太陽能發電總裝機容量將超過14億千瓦以上；瑞信更牛，預期可達19億千瓦。風電股嘅老大金風科技（2208）已連日破頂，周一再升6.6%，收14.3元；不過，該股7月下旬以嚟，已被炒過多轉，宜候回吐吸納。
割柑人
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
操盤手札記 - 割柑人 舊文
來源 source: http://hk.news.appledaily.com
